準備尖叫!大坑發現抹茶火鍋

發佈: 2016.11.25
文:

抹茶之終極,終於入侵火鍋界。請放心,由大坑刨冰專門店「越後屋」創出嚟嘅抹茶火鍋唔係烚肥牛、淥響鈴,係甜食嘅!
 
抹茶火鍋可以話係朱古力火鍋變奏,「湯底」是由 白朱古力、忌廉及 3 茶匙嘅 字治抹茶粉 mix 成。
 
抹茶白朱古力醬以紙鍋載住,放於置有蠟燭仔嘅爐上保溫。不過最好邊食邊攪拌抹茶白朱古力醬,以免結表面形成一層抹茶膜,食落唔夠滑溜。抹茶醬茶味濃郁,與甜度高嘅白朱古力混合,正好中和茶味嘅苦澀,但孜不失抹茶回甘,質感滑滑的,好味呀!
 
配料以生果為主,有 香蕉粒、士多啤梨、呍呢嗱雪糕、甘栗、蜂蜜蛋糕粒。配料唔夠多?可以追加㗎!香蕉及甘栗 $5、士多啤梨 $8、蜂蜜蛋糕及紅豆蓉 $12、白玉丸子及雪糕 $18。
 
生果以外,仲有香甜嘅 紅豆蓉及 自家製白玉丸子 5 粒,配料都幾豐富。
 
白玉丸子每日由甜品師自己慢慢搓出嚟,質地 Q 彈。
 
 
仲有蜂蜜蛋糕粒都必食,蛋糕蘸上抹茶醬,增添濕潤感,抹茶味澎湃,但又食到蜂蜜味。
 
食完生果及白玉丸子就走?未完㗎!身為日式刨冰專門店,抹茶火鍋仲會跟一細碗刨冰。
 
就咁食?咪咁傻豬啦!淋啲抹茶白朱古力醬落刨冰上。
 
再加紅豆蓉做配料,真係好滿足呀!
 
 
越後屋
地址:大坑施弼街 27 號地下
電話:2573 2992
營業時間:星期一至四 12nn-9pm、星期五至日 12nn-11pm
 
文:Jessie 攝:Jay
 
 

歡迎你 like 我哋 U Food Facebook Page / U Food Instagram ,取得我哋更新更快嘅資訊!

more