地點:九龍灣宏照道33號國際交易中心2樓2號舖
開放時間:12nn-2pm期間供應（半任食放題）
電話:2796-7788
魚生丼熱潮持續不久，九龍灣一間日本餐廳鳴門割烹料理，近月就以魚生飯為主角，推出午市半任食放題。
成人每位收費$188，小童$98，聽落價錢不算十分親民，但計落平日食一碗有拖羅/海膽的海鮮丼都貼近這個價位，就等小編睇睇究竟回唔回到本！
半任食放題逢星期六及日12nn-2pm供應，用餐限時90分鐘，由入單起計。
首先要揀一款主食，選擇多達8款，如魚生飯、肉扒、鍋物等等，回本率最高的非三色丼莫屬！一碗有齊拖羅蓉、三文魚子和海膽，拖羅蓉軟綿綿，結合三文魚子爆出來的淡淡海水鹹味，味道特別鮮甜。
雖然海膽只使用加拿大膽，味道不夠日本膽般甘濃，但幾新鮮，大大件厚身軟滑。
不建議選擇鍋物，各款食材上枱時已經煮熟，沒有配備煮食爐，味道不錯但牛肉、芋絲等食材容易過熟變韌。
至於任食食品方面，選擇超過20多款，刺身質素甚高特別是甜蝦。甜蝦刺身大大隻，肉質彈牙，而且好鮮甜值得一再encore。
而手握壽司為一口size，一啖一件，可以試多幾款。推介劍魚腩壽司，魚生肉白略帶淡淡粉紅色，柔軟而且脂肪多，好味！
食完刺身壽司，輪到熱食。小食和燒物即叫即製，出餐時熱辣辣，牛舌輕輕以黑胡椒調味好香口，肉汁亦幾豐富。其他小食如芝士年糕、明太子玉子燒、芝麻雞翼、茶碗蒸也是小編的心水之選，連同數款飲品全部任點。
總括8大回本食品：三色丼、帆立貝海膽丼、甜蝦刺身、劍魚腩壽司、厚燒牛舌、明太子玉子、芝士年糕、日式蒸蛋
雖然任點食品款式不算很多，但勝在即叫即製有誠意，加上魚生質素甚高，如果喜歡食海鮮丼的友有容易回本，周末gathering不妨一試。
*另收加一
文：HK港生活
