堅嘅鮮魚行學校

發佈: 2017.04.06
文: 小儀

今期我哋一齊長知識,我帶大家去西營盤上堂。今次上堂,我哋突破常規,唔使念書同死背嘅,嘴刁刁夠為食嘅就有資格入學,let's go 啦。

我係 ABC 嚟㗎Aberdeen Born Chinese 呀,食魚大㗎,都畀呢度處理海魚嘅方法震懾咗。大家都知喺香港食魚,都離唔開清蒸、油灒、煎封咁,但呢度就用西式嘅方法加埋啲本地元素炮製,咁突破盲腸做法,我梗係要嚟以脷學嘢喇。

學校嘅廚藝總監 David,本身讀番書,又開過幾間西餐,以為佢都係跟返西餐嗰套咁,煎下海鱸、龍脷咁,你就錯晒喇。煮食無疆界嘛,佢話香港以前漁村,優勝位係有游水嘅海鮮海鮮,正貨都擺起眼前,點解仲要用冰鮮西洋貨喎?於是佢朝朝去鴨脷洲街巿買海魚。點解唔叫供應商拎貨嚟?咪就係想親自睇吓街巿有乜是日靚海魚囉,佢仲要潮跟漁民,專揀無乜人「吼」嘅細魚,佢話呢啲魚魚肉又滑、又有魚味、仲要多多魚油,唔好好炮製佢哋,就蝕晒底啦。

David 話佢鍾意用手釣魚,因為啲魚肉會彈啲同滑啲。嚟到一定要試佢哋嘅 Fish School Specialties,即日鮮配上唔同嘅西式做法,好似法式牛油煎、鹽焗、甚至炭燒嘅方法做,總之就睇當日大廚心情同有咩魚啦,我嗰條魚大大鑊咁上枱,相當震撼㗎。

作為膽固醇同好學系嘅一級榮譽畢業生,嚟呢度會興奮到暈,因為有唔少海鮮都係街巿貨,好似蟶子、八爪魚、蟹同龍蝦咁,玩法仲幾特別,好似龍蝦咁,就將佢炸到變成巨粒的 popcorn 咁,點睛位係刨咗啲鹹蛋黃絲,係咪好有大牌檔嘅牛油黃金蝦 feel 呢?蟹飯我都 like like,呢個飯有創意,生醃蟹加埋海膽墊底係糯米飯,大家諗到乜呢?係咪籠仔蒸蟹糯米飯呢?突然覺得西餐廳都好有親切感添。

堅嘅鮮魚行學校

Fish School Specialties 時價(兩位用)

堅嘅鮮魚行學校

Sea Cucumber $145

Lobster Popcorn $180

堅嘅鮮魚行學校

Octopus / Prawn Ceviche $160

堅嘅鮮魚行學校

Raw Crab / Sea Urchin Rice $170

Fish School 
地址:西環西營盤第三街 100 號地舖
電話:2361 2966
營業時間:6pm - 11pm

原文刊載自U Magazine

more