街市不再只是年長一輩的集中地，近年香港的街市頻頻翻新，基本的鮮肉蔬果檔以外，也引入不少街坊小食店，吸引年輕人行入街市幫襯。
位於九龍灣啟業邨內的街市，最近經翻新後重新開幕，外觀看起來似一個個貨櫃，設計頗新穎。設計再新鮮，無「內涵」亦都無用，等小編潛入睇睇重新開幕的街市究竟有無吸引力！
街市一部份繼續有多售賣蔬果、肉類、柴米油鹽，另一方面，啟業街市更新增了一條「小食街」，合共有多間小食店進駐，食品選擇多了很多，立即睇睇7大精選新店介紹：
1. 食好啲
主打開平美食，主打食品必定要數香港比較少地方有售的「櫃桶腸粉（$16起）」！腸粉配料簡單，如瘦肉、冬菇、蔥花，放上鐵板後淋上自家磨製米漿，放入蒸櫃內蒸熟，剷起即成。
「櫃桶腸粉」的口感較港人平日食開的「布拉腸粉」煙韌，嫩滑皺摺腸粉中夾着香口配料，加上自製辣椒和菜莆，特別惹味。
店內亦有出售花茶、糉、蒸魚，同樣受街坊歡迎，特別是四式花茶，加入羅漢果甘甜解渴。
2. 包．點
供應點心和缽仔蒸飯為主，新鮮熱辣，而且價錢合理，比較多長者幫襯。
3. 新興車仔麵
場內唯一一間供應車仔麵的店鋪，另有港式街頭小食如碗仔翅、燒賣、魚蛋，大大隻的瑞士雞髀多汁肉嫩，好味！
4. Easy 小食亭
主要售賣台式飲品（約$16），如珍珠奶茶和百香果茶，雜果涼粉和西米露等消暑甜品均用上時令水果。
5. 勁之味
由屯門殺出九龍灣，人氣炸雞髀以外，$14十二粒的炸燒賣亦相當抵食，大部份炸物都即叫即製。
6. 家餸（街市內）
由泰國人經營的泰式小食店，嫌海南雞飯份量太多，不妨試試去骨泰式手撕雞（$40份），加上青菜絲、洋蔥、泰式酸辣汁，非常開胃！
另有幾款泰國甜品選擇，如芒果糯米飯、千層糕、椰汁糕選擇。
7. GOGO糕（街市內）
主打港式傳統糕點，缽仔糕（$5.5/件）現場新鮮即製，件件暖笠笠，如果想食「無豆缽仔糕」的話，最好提早預訂。
即撞豆腐花亦相當受歡迎，$8一碗，豆腐花豆味頗濃，順滑，建議熱食，加黃糖和桂花糖漿都好味。
地點:九龍灣啟業道18號啟業商場地下
開放時間:8am-8pm（街市內）/8am-10pm（外圍小食街）
