芒果撻食譜|芒果甜品最適合炎炎夏日!這次做款好味賣相一流夢幻甜品—芒果芝士撻食譜。免焗芒果撻做法簡單,除了免搓免焗餅底,芝士餡部分用到芒果味啫喱粉,方便之餘味道更有如小時候常吃的芒果布甸,濃厚芝士混合清新芒果,酸甜冰涼。頂層鋪滿芒果砌玫瑰花型,超級夢幻打卡一流,大家不妨試試啦~
-
準備時間
30分鐘內 -
份量
4人以上
- 芒果: 2個
- 忌廉芝士: 100克
- 淡忌廉: 100ml
- 芒果味啫喱粉: 1盒 (80克)
- Lotus餅: 150克
- 魚膠粉: 5克
- 牛油: 40克
免焗芒果芝士撻做法:
1. 將餅乾放入密實袋壓碎,牛油放入微波爐叮至融化。落牛油溶液拌勻,倒入撻模壓成餅底,放入雪櫃冷藏20分鐘。
2. 芒果味啫喱粉混合一半淡忌廉,忌廉芝士與其餘淡忌廉打發,加入芒果啫喱溶液和魚膠溶液。
(魚膠溶液做法:魚膠粉與1-2湯匙冷水混合,然後可在微波爐加熱十秒溶化至沒有顆粒。)
3. 芒果芝士餡倒入餅底,冷藏至少3小時到凝固。
4. 芒果去皮去核,切片。排好放在撻面即成。
完成啦!芒果酸酸甜甜好適合夏天食,酥脆lotus餅底加上冰涼軟滑芝士餡,用啫喱粉整芒果芝士餡也更容易方便,味道好似童年回憶芒果布丁,面頭鋪上清新啖啖芒果肉,外形好夢幻!各位芒果控就不要錯過這道甜品啦~