今年因疫情關係，聖誕節有可能要在家度過，除了叫外賣到會外，大家不妨考慮親自下廚！這次就推介8款聖誕應節西式食譜，有齊餐湯、小食、主菜到甜品，無論想煮浪漫聖誕2人餐定同朋友開聖誕party都一樣得。而且每道菜色做法簡單，大多1小時内完成，新手在家都可以輕鬆煮出聖誕大餐！
1. 南瓜濃湯
打頭陣的餐湯，又點少得這一道南瓜蔬菜濃湯食譜，南瓜是秋冬的時令蔬果，既低碳又高纖，無忌廉版更健康，若用水代替清雞湯亦適合素食者。這個食譜無需攪拌機都做到，方便之餘，飲多幾口都不會怕肥！
2.黃金牛油果條
這款酥脆甘香的黃金牛油果條簡單3步就做到，以烤焗代替油炸卡路里更低，牛油果更被譽為「超級食物」之一，絕對是健康之選的聖誕小食料理。
3. 芝士肉醬焗薯蓉
每逢開party，肉醬意粉老是常出現，這次就用香滑的薯蓉代替意粉，而且簡易4步就做到，酸甜的番茄醬十分開胃，這道零失手料理絕對可以在派對上秒速「清零」。
4. 免焗蒜香牛油雞翼
雞翼控注意！誰說聖誕大餐一定要有應節火雞？兩個人在家吃不完一隻火雞，不妨改做蒜香牛油雞翼。這款雞翼加上香氣四溢的牛油和蒜蓉，非常惹味，讓人吃不停口，又是另一款4步輕鬆做到的party小食！
5. 番茄紅酒燉牛肉
牛肋條入口即化，口感非常軟諗，每一口都散發着淡淡紅酒香味，冬天吃燉菜立刻幫整個人暖身！這道法式料理一點也不複雜，是成功率非常高的聖誕大餐菜式之選，新手變大廚不是夢。
6. 蒜香白酒蜆意粉
這款蒜香白酒蜆意粉30分鐘內就能完成，白酒配海鮮味道好夾，自己煮蜆肉份量更多，可以作為二人大餐的主菜，又或是Lonely Christmas一人獨食亦得！
7. Baileys甜酒生朱古力
在外購買生朱古力價錢通常都有點昂貴，不如就試下自己整啦！這款生朱古力做法容易，入口即溶，而且加入人氣Baileys百利甜酒，充滿聖誕氣氛，是款不錯的零失手甜品食譜。
8. 士多啤梨聖誕老人
這道非常吸睛的DIY甜品小食絕對是零難度！而且不用明火，聖誕老人造型超級可愛，用來打卡一流，last minute來不及整聖誕蛋糕不妨可以考慮一下。
