歎榴槤 最新上位蒲點

2014榴槤去到季尾，居然仲有榴槤專門店開，以下推介榴槤粉絲一定要榴槤忘返的上位蒲點！

Shop 1：貓山皇專門店出城
識得食一定揀貓山皇，不過買一個閒閒地索價300、400元，難得有元朗小店開宗明義用貓山皇做甜品，更以大眾化的價錢示人，仲旋即進駐港島。

舖頭老闆是前Road Show主持Viann，與新加坡名店「四季榴槤」甜品店合作，所有recipe跟足當地配方，以西式甜品為主，如泡芙、班戟、雞蛋布甸、糯米糍、奶昔等，堅持全用100%貓山皇果肉，好揼本。焦點有即叫即做的法式薄餅，裹入軟滑冰凍的榴槤果肉，層次豐富，其獨有的清香與after taste回甘味，讓滿室充滿榴槤香。更應港人口味，增設香港獨家甜品，如酥脆的拿破崙、榴槤生日蛋糕等，稍後更在北角、大埔開店，榴槤迷有福了！

銅鑼灣店雖然地方較細，但勝在坐得舒服cozy。加上門外的貨櫃門由二手改裝而成，既環保又有心思。

夢幻貓山皇雪糕 $68
幼滑的軟雪糕具濃郁榴槤清香，伴以鮮芒果爆珠和自杏仁條，加上乾冰營造煙霧效果。

榴槤班戟卷 $58 兩件
較熟的餅皮捲入1:1的榴槤果肉及忌廉，又香又滑。

榴槤脆皮夾餅 $42件
熱辣辣的薄餅即叫即做，夾著純天然貓山皇果肉，啖啖都是榴槤香。

貓山皇冰皮月餅 $398 四個
店子也從新加坡運來「四季榴槤」推出的冰皮月餅，不設傳統鐵盒，改為附送兩個冰袋，既環保，而且只要將保溫袋拿回來購買外賣甜品，可享95折優惠。

貓山皇
地址：銅鑼灣希雲街30號地舖
電話：2618 9032
營業時間：1pm - 1:30am

Shop 2：升呢馬拉專門店
眼見近年馬拉榴槤上位，「沛公」於是將旺角分店升呢，打造成馬來西亞榴槤專門店。此店最大賣點是所有榴槤系甜品都有 D24 及頂級貓山皇兩個版本揀，豐儉由人。榴槤每天空運到港後會放至完全熟透，令甜度達至最高，才交到相熟水果店起肉做甜品。

果肉飽滿 creamy、味道細膩濃郁有回甘，會用來做千層班戟、啖啖果肉的糯米糍及法式燉蛋等，還有馬拉最潮的榴槤咖啡及朱古力沙冰，每款甜品至少含 4 成新鮮榴槤肉，真材實料。

榴槤千層班戟 $78（D24）、$128（貓山皇）、榴槤咖啡 $88（D24）、$138（貓山皇）
班戟轉用貓山皇製成，即時濃味 2 倍以上；另有馬拉流行的榴槤咖啡，在咖啡上混入新鮮榴槤肉打成的泡沫，攪拌飲用兩者香度提升。

榴槤糯米糍　$108（D24）、$158（貓山皇）
軟熟的糯米皮內是啖啖果肉，大滿足！

榴槤朱古力沙冰 $88（D24）、$138（貓山皇）
榴槤與朱古力看像大攬都扯唔埋，將榴槤與黑朱古力粉攪成，香甜消暑。

榴槤法式燉蛋 $88（D24）、$138（貓山皇）
軟滑的燉蛋中放入 1 匙羹的鮮榴槤肉，不必攪勻，一口燉蛋一口榴槤，口感更正。

備註：所有榴槤產品一律半價。

沛公甜品
地址：旺角廣華街 3 號百利達廣場地下 1 號舖
電話：2771 1114
營業時間：星期日及四12nn - 1am，星期五及六 12nn - 2am

Shop 3：精緻版貓山皇 Tea Set
將榴槤甜品做成 tea set 並在酒店內吃，成件事便 elegant 了。糕餅總廚 Danny 來自馬拉，擅長做榴槤甜品，9 月推出這款tea set 一碟有 5 款創意度高的榴槤甜品，味道由淡至濃，分別有瑞士卷、梳乎里、松露朱古力、拿破侖等，全用貓山皇製成，榴槤每星期空運到港，即開即拆肉來製甜品。

當中最特別馬拉街頭小食「榴槤雞蛋仔」，傳統只得咖央、花生等口味，但 Danny 在中心擠入班蘭汁、榴槤肉和椰汁的餡，配杯香濃咖啡，吃榴槤都優雅過人。

爐具由馬來西亞運來，粉漿則以鴨蛋、牛奶等製成，有點像章魚丸，倒入蛋漿並擠點榴槤 filling，口感像雞蛋仔般軟熟煙韌。所有貓山皇全部新鮮空運到港，即開即起肉來做甜品，因此甜品的榴槤味像好fresh。

榴槤甜品拼盤　$188（包一杯咖啡或茶）
5 款甜品全由新鮮貓山皇製成，賣相精緻，像松露朱古力以 64% 黑朱古力包著冰凍榴槤果肉，味道最澎湃；拿破侖中心是榴槤吉士，口感酥脆香滑；還有入口如風的梳乎里，啖啖都有榴槤香。

The Market
地址：尖沙咀科學館道 17 號唯港薈地下
電話：3400 1300
供應日期：9 月 1 日至 30 日（逢星期六、日及公眾假期）
供應時間：3:15pm - 5pm

(原文摘自《U Magazine》、文：pi、圖：ken、sky、ki、nova)