雞，你估我食得少呀？但上枱仲識企喺度嘅，又戴晒紳士帽，仲配咗幅今年春夏至潮嘅士多啤梨烏蠅鏡咁爆嘅，食齡資深如我，唔小心跌咗個震驚表情出嚟，真係唔怪得我。
呢隻紳士雞就勁囉，其實廣東一帶都好興食呢種「企鵝雞」，通常都係滾油照頭淋，但係師傅就做得好 fine，有鮮雞係用鮮雞嘅，用「溫油」浸再風乾 12 小時，臨上枱再淋上滾油同芝麻，啲雞皮脆口到好似薯片咁，但雞肉好滑。鬼馬嘅師傅仲要同 Mr Chicken 戴番頂禮帽同士多啤梨墨鏡先出場，幾鬼華麗，但最殘忍嘅係 Mr Chicken 一上枱畀食客影幾張靚仔相就瞬間畀職員剪到碎一碎，明星雞一下子殞落，世事就係咁好味地殘酷架啦，大家習慣下。
唔記得講呢度嘅老闆係 Andrew，年紀唔講啦，佢年齡仲可以申請到傑青囉，後生仔有新思維，所以啲菜式都好玩嘢，呢度有個叫「敗家仔雞煲」嘅物體，食雞煲咪雞煲囉，為食嘅佢偏偏要好敗家咁加鮑魚、花膠同海參，又嘴刁要用鮮雞，同佢一樣為食嘅，仲可以加配埋蒜蓉牛油多士盒，奢侈但味道唔錯。記得食埋個拔絲生果，呢度有位拉糖好叻叻嘅師傅，拔絲係佢即場拉嘅，好甜好脆；連碟邊嘅「糖伴」都講究，睇吓蝦貼旁嘅裝飾，係用糖倒模做嘅珊瑚同 Nemo 仔，真係食得，好多大朋友小朋友搶住要食。
哎唷！差啲唔記得講，呢度嘅午市套餐好抵食，湯米綫、炒飯、大碗飯或者蒸餸小菜客飯，連埋前菜同老火湯，都係 $50 左右，茶餐廳價但中高檔格調，兼且供應到 5pm，係尖咀唔少 sales 嘅秘密開飯地點。
大力棒棒
地址：尖沙咀彌敦道 100 號 The ONE 商場 L409 舖
電話：2369 9825
營業時間：11:30am - 10:30pm
(原文摘自《U Magazine》ISSUE 486、文：小儀、圖：LamLam)
