不過，唔通連個天都咁鍾意我？據最新最快最精準嘅 U Magazine 報道，上環開咗間葡撻店，聽聞開咗無耐就已經人氣大旺，有喺上環返工嘅朋友話夜晚 6、7 點就已經售罄，成日撲空，唔通真係好食到咁？咁鬼厲害，不去搶吃我就不是人呀！
我留定肚嚟挑機，嗰日黃昏殺到去，嚇死我，個餅櫃得返十零個葡撻咋，原來黃昏就賣晒嘅傳聞係真㗎，好彩我早咗幾分鐘嚟，緊隨我之後就有 2 個 OL 嚟話要買半打走，好險。入到嚟，最令人口水流嘅係舖頭飄嚟好香好香嘅焦糖味同蛋味，呢個時候，居然有一大盤剛出爐，死唔執輸嘅我梗係要即刻食吓先。阿姐！畀件燶啲嘅。啱啱出爐真係零舍唔同，啲蛋漿滑嘟嘟㗎，蛋味又重，最正係個酥皮好鬼脆，仲要唔鬧都咁鬆化，咬落去真係有 「嚓」一聲。有圖有真相，睇下個橫切面幾咁四正，師傅有料到。
同我一齊影相嘅師傅 Raymond 話最勁一日賣 1,000 個，佢話打酥都打到佢手軟，佢真係葡撻大師嚟，佢唔單止喺澳門安德魯餅店做過 4 年餅廚師，更喺米芝蓮三星餐廳 L'atelier de Joel Robuchon 當甜品廚，獨沽一味賣葡撻就要做到最好，雞蛋用蛋味重嘅美國雞蛋，仲用純蛋黃製，唔溝粉唔溝水，蛋漿裏又加咗法國忌廉，而且隻隻都要焗到有焦糖皮先賣畀客人，佢仲出咗隻蛋白葡撻，啲蛋白好似 panna cotta 咁滑，健康啲，都好多人賣。
由於真係太好賣啦，啲葡撻會不停出，不過一盤得嗰 35 隻，真係眨下眼就賣晒，據講黐綫到呢盤都未賣完，下一盤都未出，已經畀排隊嘅人訂晒，要食睇嚟真係要有啲耐性喎。
皇子工房
地址：上環永樂街 80 號地下
電話：6684 4963
營業時間：12nn - 8pm
↓【限時搶⚡】Kilo Calo慢煮即食雞胸套裝！↓
↓ 雞胸經低溫慢煮烹調！/ 提供研製多時的獨特口味！↓
↓【限時搶⚡】Louiscocoa鳳梨啤酒口味可可即沖營養代餐奶昔！↓
↓ 首創含微量酒精代餐 / 嚴選高級可可粉 / 加水即沖即飲！↓
