本來呢個 buffet 已經出名海鮮多，近日，佢哋逢星期六仲將海鮮升級，價錢上只係多幾十蚊，卻增加咗近三十款的海鮮。咁吸引，梗係率先試下，來個食後報告。
有咩加碼？
海鮮加碼不只是凍盤區，連熱盤區都加入唔少海鮮嘢。總括來講，食得最多的都係龍蝦、蝦、蟹！
凍海鮮：個個入座後第一 round 都係 queue up 攞凍海鮮，條 queue 都真係唔短！之不過佢地款式真係款好齊量好多：波士頓龍蝦、小龍蝦、凍蝦、阿拉斯加蟹腳、鱈場蟹、加菲蟹、翡翠螺、凍蝦、睡蟹、青口、帶子等數得出應該有的都有齊，而且放出來的數量好夠，就算條 queue 幾長，埋到去都唔會要呆等 refill。呢個 buffet 向來唔供應即開生蠔，對不少蠔精來說是有點可惜。今次加碼仲自家醃製了不同的三文魚口味，愛爾蘭有機三文魚有原味煙薰、香橙、檸檬、薄荷、綠茶、咖喱、刁草及紅菜頭味可揀，綠茶 match 得唔錯，個咖喱味就怪怪咁。呢度個凍盤 counter 真係齋食兩三 round ，個肚已經飽咗一半。
熱盤：食一般的自助餐，基本上我都自動 skip 了熱盤，因為真係揀唔到嘢啱食嘛，無謂浪費了肚皮 quota。不過，呢度啲熱盤又真係幾吸引。先講新加的有由廚師即煎的龍蝦仔、西班牙紅蝦、原隻大魷魚，grill 完的龍蝦仔仲香嫩過凍食，當然要 encore！紅蝦、魷魚都唔錯，但唔夠龍蝦香。另外，仲有用銅鍋載住的煮蜆同青口，兩款都好得！蒸魚幾滑，原個焗蟹蓋食到絲絲蟹肉，不個食完一個就係有膩。蟹粥煲得綿香，就算唔食蟹身，個粥的蟹味都好夠﹔咖喱大蝦個汁幾香，蠔精必食焗生蠔，其他必食的還有做出扒房水準的燒牛肉、煎鵝肝同埋燕窩海鮮羹等。反而一份份有饃饃皮包好的北京烤鴨就唔係好食得出脆香的烤鴨。
甜品：甜品款式都有廿多款，以西式糕點 pastry 為主，大部分都係細細件賣精緻，最吸睛係好大個芒果拿破崙，雖然在 buffet 中放咗咁耐，食到尾都仲幾酥化，芒果 custard 香甜。雪糕係 Haagen-Dazs，有 6 款味道可揀﹔水果中仲有血橙食，又幾估唔到。
飲品呢？
坐低已經包你一杯 welcome drink，可選果汁、紅白酒、cocktail，都幾大杯！最後仲有一杯茶/ 啡。飲完杯 welcome drink 嫌唔夠喉，可以加 $68 任飲果汁、茶啡，加 $98 任飲紅白酒、cocktail、果汁、茶啡。
2 個半小時絕對夠！
星期日至五，呢度的 buffet 係食足 4 小時，但星期六的 buffet 向來分 5:30pm-8pm，8:30pm-11pm 兩場，實食 2 個半小時，實戰過後，我覺得絕對足夠有餘。重要的不是時間，而是枱上的東西都啱食而且想食，回本無難度。
終極 Tips：呢 2 張卡有 8 折！
逢星期六呢個 buffet 都有折的信用卡只得 2 張，恆生白金卡同匯豐白金卡，兩張都有成 8 折，折完實收 $840 左右，都平一截，記得孖埋有卡人士去食啦！
港畔餐廳
地址：尖沙咀梳士巴利道18號洲際酒店大堂低座 Harbourside
電話：2313 2323
「海鮮盛宴」(Seafood Extravaganza)
供應時間：逢星期六 5:30pm-8pm (第一輪)、8:30pm-11pm (第二輪)
收費：成人 $898、小童 $628，設加一
↓【出Post賺現金賞】《社群》助您發展創作者事業↓
↓透過發佈帖文賺取收入！立即參加！↓
↓【限時搶⚡】Louiscocoa鳳梨啤酒口味可可即沖營養代餐奶昔！↓
↓ 首創含微量酒精代餐 / 嚴選高級可可粉 / 加水即沖即飲！↓
