我話呢度係 hidden gem，因為帝苑實在好多好嘢食，又東來順、又稻菊、又 Sabatini、le Soliel，仲有餅店，間間都咁正，所以次次咪走漏眼囉，大家都漏咗提呢間正嘢，唔係泰山 BB 有次約我哋嚟食團年飯，我都唔知帝苑有間咁正嘅中菜喎。我好後悔咁遲先發現好嘢...俗語有云：早嚟早享受，今次我真心蝕咗。
首先令到我神魂癲倒嘅，係糯米飯呀，個糯米飯吸晒斑球嘅魚味，嗰啖飯呀，又韌又有少少濕濕地，魚香仲...嘿嘿嘿...一個字都講唔晒：鮮鮮鮮鮮鮮 ∞，每次嚟都唔食唔得㗎。真係唔係吹水，呢味嘢，出面唔少小炒店都有，但係做到好總廚何偉成師傅咁撚手，真係日積月累嘅功力，佢將啲斑片蒸到嫩滑過心悠 BB，但又逼晒啲魚汁出嚟，啖糯米飯先至咁鬼索...盡精華，成哥你係得嘅！
成哥見我次次都喙住個糯米飯死唔放口，終於按耐不住我呢個咁頑固嘅食客，一定要我試下佢嘅新菜──雞油花雕蟹，大廚出馬，梗係唔係坊間的平凡做法，大家睇真啲黃色嘅醬汁，係咪好滑呢？原來阿成哥相當鬼馬，佢個雞油用咗好似整 carbonara 意粉汁嘅做法，用雞油、花雕蒸好啲蟹汁後，超扮嘢咁、好似整 carbonara 汁咁趁熱撈埋意大利蛋再發起，咁個雞油蟹汁既稠身、又滑溜、但又輕盈，蟹味香到爆炸，包住隻成 1.4 斤嘅汁多多、厚厚肉嘅紅花蟹，真係蟹味 double up，我有舔乾淨個碟底嘅衝動，不過話晒係公眾場合，都係叫個靚仔撈埋啲汁，靠扒飯解決件事。
成哥啲海上鮮堅係有一手㗎，個龍皇炒麵係豉油皇炒麵底，好好食；上湯焗中蝦，蝦又肥又彈牙，最正係塾底個米粉好似吸濕大笨象咁吸晒啲上湯，蝦味好甜；連懷舊嘅焗魚腸超香口，啲魚腸無標水又無腥味，好爽，最抵死成哥加埋啲油條同芫茜梗落去，芫茜香噴噴，食到我哋舉埋隻腳投降。
帝苑軒
地址：尖沙咀麼地道 69 號帝苑酒店 B2 層
電話：2724 2666
營業時間：星期一至六 11:30am - 3pm、6pm - 11pm，星期日及公眾假期 10am - 3pm、6pm - 11pm
想睇更多？即上 尖沙咀 特集！
歡迎你 like 我哋 U Food Facebook Page / U Food Instagram ，取得我哋更新更快嘅資訊！
