14 位廚師新出嘅招牌菜包括自家醃製及煙燻三文魚、田園沙律、砵酒藍芝士、海鮮放題、火炙龍蝦三文魚卷、龍蝦喇沙、慢烤豬柳、香烤加拿大認證高級有骨西冷、印式烤羊腿、泰式冬蔭功湯、泰式蒸粉卷、紅燒肉、心太軟以及綠茶拿破侖。
首先一定要講下大家都熱愛嘅海鮮啦，阿拉斯加蟹腳、波士頓龍蝦、玻璃蝦、青口、蟶子等都有供應，而自助晚餐更有空運到港嘅即開生蠔，齋講呢樣已經非常吸引。鍾意食 salad 嘅客人，可以選擇自家醃製及煙燻三文魚，亮點在於 Café Kool 用上各種自家製香料去醃製三文魚，例如綠茶、咖啡、芥末、印式炭火燒及豆瓣醬等，甚有創意。
如果你係食肉獸嘅，一定要試晚餐先有嘅香烤加拿大認證高級有骨西冷，將加拿大安格斯西冷牛扒，配上自家製嘅約克郡布丁及多款香烤蔬菜及醬汁，更特別準備一系列自家製海鹽 - 薰衣草、炭火、青檸、香橙及綠茶。
如果你係追甜品嘅，Café Kool 都會令你有驚喜。行政糕餅總廚 Thomas 用上法國優惠 dark chocolate 以及自家製塔希提威士忌酒香草汁，炮製顧客最愛嘅流心朱古力蛋糕，而且 refill 得快，每 15 分鐘新鮮出爐一次。
依家 Café Kool 更玩小玩意，惠顧自助午餐或自助晚餐嘅客人均可獲贈一個小禮盒，客人可以從 deli Kool 挑選糖果，裝滿小禮盒之後帶返屋企！
月巴氏評語：
| 1. 事隔數日，還是忘不了那一晚去到現場時的狂野欲望——好想連袋都唔放低就衝出去拎嘢食吖！OK，去得食 buffet 自然是想狂食，但我總會先放低個袋，懶係冷靜咁坐低、飲啖水，盤算戰略……但 Cafe Kool 明顯令我失去理性。 2. 喪失理性的我衝了去 BBQ 部門。駐守的月巴師傅仔推介我試即燒西冷，我答：「咁要一件吖。」師傅仔回應：「要夠兩件啦！」燒的期間又說：「不如試埋煙肉啦！」那一刻的我，唔知點解地甚麼都應承——可能是因為那朕 BBQ 香味，也可能是基於師傅仔的熱情。而事實證明，冇介紹錯！所以我立即衝出去再拎西冷，師傅仔說：「不如試吓加拿大穀飼牛，可以幫你燒燒佢喎。」盛情難卻，一片唔該！再次事實證明，冇介紹錯。當這個城市已變得過分冷靜，我欣賞這位師傅仔的熱情。 3. 是的，那一夜，大部分時間都幫襯 BBQ 師傅仔，但還是有抽出珍貴時間（和胃空間）試吓其他——例如叻沙。今時今日，好多 buffet 都有提供叻沙，但不是有色而無味，就是無色無味無臭……我可以好大膽咁講，這裡的叻沙是我暫時在 buffet 食過最好的——我甚至差啲將成碗湯乾晒去。 4. 隨著年齡和閱歷增長，我愈來愈愛甜品（愛甜品和閱歷有甚麼關係？唔好問）。坊間 buffet 甜品望落林林總總，但其實大家提供的都 OK 相近，冇乜邊樣留到喺心——但我的心一直記掛住這裡的心太軟。外籍 chef 即焗即製，需時 15 分鐘，你絕對不能心急；但這 15 分鐘的等待，絕對值得。 5. Final Round，心血來潮想食個即煮意粉 KO 這一餐。這裡給你自由選配意粉種類和配料，我點了茄汁 + 肉醬 + 蜆肉 + 長通粉——但當我準備行返埋位享用時又（專登）經過 BBQ 部門，於是又 order 了兩件即燒西冷——放埋一齊，結合成「月巴氏激情 BBQ 西冷伴茄汁肉醬蜆肉長通粉」！最後，究竟當晚食咗幾多件 BBQ 西冷？我唔知，只知道好想嚟多幾 round。 |
|
月巴氏 info 專欄及漫畫作家，曾推出小說〈超人間失格〉、專欄結集〈月巴事：然而人在世界誰能沒去路〉等。 自稱「孤獨的暴食家」，最愛單拖食 buffet，平均一個月至少食 2 次。他的 buffet 哲學──享受選擇自由，不計算回本與否。 |
Cafe Kool
地址：尖沙咀東部麼地道 64 號九龍香格里拉大酒店閣樓
電話：2733 8988
Café Kool 自助午餐
供應時間：每日 12nn-3pm
價錢：星期一至五 成人 HK$328/位、小童 HK$248/位
星期六、日及公眾假期 成人 HK$408/位、小童 HK$288/位
Café Kool 自助晚餐
供應時間：星期一至四 6:30pm-9:30pm、星期五至日及公眾假期 6pm-9:30pm
價錢：
星期一至四 成人 HK$578/位、小童 HK$458/位
星期五、六、公眾假期 成人 HK$628/位、小童 HK$488/位
星期日 成人 HK$578/位、小童 HK$458/位
* 另設加一
歡迎你 like 我哋 U Food Facebook Page / U Food Instagram ，取得我哋更新更快嘅資訊！
