卡哇兒甜丼丼

其創作人還慌死你唔冧，不斷打出 kawaii 牌，，一於以 kawaii 傷人狂推卡哇兒甜品，預求呼喚出大眾的少女心。

好人好姐，明明係甜甜芒果蒟蒻又走去扮半熟蛋黃哥哥，仲要夾埋一大堆爆爆珠扮晒爆汁蟹子，芒果片扮刺身丼，明明甜美可愛到膩，偏偏又以假丼飯形象示人，大家想不舉機嚓嚓嚓都不行。

Cutie 到咁，難怪開店數月，舖內靚樣甜品已在 instagram 洗版，幕後推手正係 Kiki 同阿 B 兩姊妹，她們本來就擅長做拉糖 3D 蛋糕，見呢期卡通人物咁 hit，就動動巧手做出各種可愛到暈的甜品。除了假扮嘅刺身丼飯，仲有芭菲杯、公仔拉花 latte 同埋卡通公仔蒟蒻，人氣嘅芭菲杯，可愛程度同蛋黃哥甜丼丼有得 fight，用芒果雪糕扮卡通人物個頭，有中分界嘅壞蛋掌門手下 Stuart 同日系少女心水蛋黃哥造型，芭菲杯有時仲會 load 出心心眼 Minion 造型，真係可愛到唔捨食，店裏嘅人類 selfie、usie、groupfie、hefie 同 shefie 乜都齊，OK！OK！喺 instagram 你赢晒。

特別推介：
日式甜丼丼 $78
真係激似真正嘅刺身丼，最矚目梗係中間嗰隻真假難分嘅「生蛋黃」，其實它是芒果蒟蒻，加埋朱古力製嘅面孔，騙人伎倆超高；另一抵死位當然係「三文魚子」，係草莓味嘅爆爆珠，連大小同爆汁狀態都同真嘅三文魚子一樣，不過係味道係甜唧。加埋呂宋芒、桃子扮刺身，下面墊了自家製青檸雪葩扮「米飯」，配北海道 3.6 牛奶奶凍、雪糕糯米糍扮日本「餡蜜」糰子及串成像燒豆腐嘅蜜糖小吐司串，好成功咁呃到人同呃到 like 啦。

芒果芭菲杯 $42
公仔豆係芒果雪糕，下面就有鮮忌廉、呂宋芒、芒果啫喱及粟米片相間，芒果雪糕味芒味好香，最正係用上甜度高的呂宋芒果肉，份量超多，一杯一個人食唔晒。芒果雪糕球上的圖案會隨機出現，有時是蛋黃卡通人物，有時是壞蛋大眼 look，又時又出現心心眼，但保證杯杯可愛到殺死人。

宇治金時芭菲 $48
日本版綠茶 pocky 朱古力棒，粟米片、綠茶蒟蒻、紅豆粒、綠茶忌廉配埋綠茶味雪糕，限量供應，一杯份量都幾大，雪糕頭超級引入犯罪，真係好想咬爆大眼仔個可愛死人頭。

藍莓蒟蒻 $20
造成部長熊嘜頭，質地爽彈。

青蘋果蒟蒻 $20
好衰㗎，加咗三隻眼仔好似外星人，做得咁似，句經典對白「個爪呀！」即時於腦海浮現。

芒果蒟蒻 $20
蜜糖熊個樣已經令人個心融化，加埋甜甜嘅 芒果味，一刻鐘就殲滅佢。

雪糕牛奶綠茶 $42
下面是綠茶加上日本 3.6 奶做的，滑溜有綠茶甘味，上面的綠茶雪糕造型堅係卡哇兒，覺得芭菲杯太大，不妨柯打這個。

SkyB
地址：粉嶺聯和道 9 號地舖
電話：5901 6008 (Whatsapp only)
營業時間：星期日至四及公眾假期 2pm-9pm，星期五至六及公眾假期前夕 2pm-10pm，逄星期二休息
收費：只收現金，不設加一
交通：於粉嶺站 C 出口，乘綠色小巴 52K 於聯盛街下車
泊車：門外可泊車
平均消費：$50

相關報導：
巴黎鐡塔LOLLY WAFFLE

想睇更多？即上 甜品 特集！

歡迎你 like 我哋 U Food Facebook Page / U Food Instagram ，取得我哋更新更快嘅資訊！