香格里拉國際美食節套餐只限於 10 月 27-31 日，所有菜式由莫師傅特別設計，既有傳統嘅佳餚，又有創意嘅賣相。小編有幸率先品嚐莫師傅嘅手藝，即刻同你開心 share！
冰鎮蟶子‧涼拌砂薑竹絲雞海蜇‧黑魚子百花釀乳豬
前菜嘅口感層次已經非常豐富，蟶子肥大鮮美，伴以爽口海蜇；竹絲雞挪成條狀，配上爽脆海蜇以及帶點咬口、微辣嘅薑絲，甚有驚喜；乳豬皮非常脆，連同乳豬皮下嘅肥肉一齊放入口，油脂味重，非常夾。
椰皇天籽蘭花花膠皇燉官燕
小編大愛呢類非常滋補、補身嘅湯水，內有花膠、官燕、豬肉、雞肉等材料放入椰青中燉，飲完湯再食埋湯渣、椰子肉，十分滋味，絕對係健康人士嘅最愛！
紅南高梅酒烤黑豚肉排
煮豚肉排不難，難度在於 sauce 醬料。莫師傅用上日本高梅酒炮製 sauce，食落豚肉軟腍，非常入味，與梅酒嘅酸味甚夾！
脆皮金腿桂花龍蝦炒新竹米粉包
貌似普通，但甚有心思。移開最上層、彈牙爽口嘅新鮮龍蝦肉，入面係一個真真正正嘅米粉包，莫師傅將米粉包成球狀再炸，米粉依然軟身！
金箔杏汁蛋白撻‧蜂巢雪糕‧咖啡蛋卷慕絲
一睇菜名，好難想像喺中菜廳食到呢款充滿中西 fusion 嘅甜品。莫師傅以早前甚 hit 嘅蜂巢入饌，甜味適中；而金箔杏汁蛋白撻，鬆脆得嚟而不油膩，good！
其他菜式還有法國生蠔配冲繩青椒柚子汁‧金杯珊瑚炒鮮奶‧蒜泥黑豚肉卷、海膽蟹鉗釀官燕、葱燒和牛粒伴脆白玉、胡椒龍蝦潮州伊麵、桂花紫芋燕窩酥‧青檸櫻花奶凍‧柑桔奶皇酥。
香宮
地址：尖沙咀東部麼地道 64 號九龍香格里拉大酒店低層 1 樓
電話：2733-8988
香格里拉國際美食節套餐
供應日期：2015 年 10 月 27-31 日
價錢：HK$1,288/位
* 另設加一
想睇更多？即上 尖沙咀 特集！
歡迎你 like 我哋 U Food Facebook Page / U Food Instagram ，取得我哋更新更快嘅資訊！
