小儀:人氣魚介拉麵

發佈: 2015.11.03
文:

今日我介紹呢間,得 10 零個位咋,名氣可能不及登龍街嗰幾間過江龍,不過有唔少日本通都同我介紹呢間,話佢哋嘅魚介湯拉麵好味,一於嚟試下先。

嘩!不得了,碗特製拉麵上枱,好震撼,有兩大塊大個我手掌嘅叉燒,大到遮咗半個碗咁滯,仲有豚角同溫泉蛋,真材實料,真係開心大胃王。湯底係而家東京最流行嘅魚介湯,你知香港人啦,食海鮮最叻叻,平時豚骨湯拉麵有時食落會覺得好稠好滯,但加咗鮮味嘅魚介,個豚骨湯會香啲惹味啲又無咁油,更易入口,真係好食夾大份。

呢碗魚介湯拉麵,背後有段故㗎。見唔見到我背後個型男,佢就係老闆長穀川忍,喺日本嘅時候佢賣衫唔係賣拉麵,半途出家喺用咗 3 年時間喺日本學做拉麵,前兩年特登嚟咗香港開舖,喺柯士甸道開咗間只有 8 個位嘅魚介湯拉麵店,嗰時 lunch time 同晚飯時間都排到痴晒綫,都係因為佢係香港第一代引入魚介湯拉麵嘅,今年搬咗嚟呢條靜焗嘅小街,感覺仲似去咗新宿啲拉麵店呀。

阿型男師傅做呢個魚介湯,不計成本咁滯。日日用成 80 kg 本地豬骨、日本雞腳、波蘭豬腳、雞殼同魚煲,仲用個大銅煲足 10 小時,湯底婹收到得返一半,真係超濃郁,飲落有豚骨鮮甜,又有魚介鮮香,鍾意重口味嘅一定會 like。

我仲要講下個沾麵,真係重量級,用 14 號麵條,粗身似讚岐烏冬,好鬼好食,原來加咗小麥粒,加咗長穀川師傅自己煉嘅辣葱油,配埋魚介湯,魚介味同葱杳香都好鬼香,我自己就幾鍾意呢款沾麵。不過,我提提大家,呢度啲拉麵係賣完即止㗎,食唔食到睇你有幾早嚟排啦。

東京 Agura

地址:灣仔麥加力歌街 1-19 號地下 A 舖
電話:2886 3226
營業時間:星期一至六 12nn-3:30pm、6pm-10pm,星期日 12nn-3:30pm、6pm-9pm

想睇更多?即上 灣仔 特集!

歡迎你 like 我哋 U Food Facebook Page / U Food Instagram ,取得我哋更新更快嘅資訊!

↓【社群送禮】麒麟一番搾啤酒及禮品套裝!↓

↓麒麟一番搾啤酒杯/櫻花富士山杯/櫻花玻璃碟↓


↓【出Post賺現金賞】《社群》助您發展創作者事業↓

↓透過發佈帖文賺取收入!立即參加!↓

more