小儀:工廠素食GREEN EVERYDAY

發佈: 2015.11.10
文:

最好有時間 green 埋 Tuesday、Wednesday...㖭,我有身體力行㗎,一有機會就去吃素,而今期介紹呢間,我已經翻咗頭去吃㖭,大家快啲嚟。

觀塘好多好嘢,呢間素食店都係我眼中其中一粒寶石,舖頭主理人叫 Ella,佢好親切,見佢客人有傾有講,同佢傾偈又好舒服,好難得。Ella 話佢以前只顧吃喝玩樂太多,茹素本來因為信佛,一吃 7 年,後來在網上看到動物補虐的片段,更加覺得要落力推廣素食,於是就開咗呢間舖,難得有心人,我真係要代 Dee Dee 多謝佢。

同 Ella 傾偈,佢話客人食得健康安心最重要,烹調時都親力親為,而且唔會用劣質嘅材料做菜,驚食壞大家。呢點絕對唔係吹水喎,大家都知道黃耳、羊肚菌同姬松茸唔係平嘢啦,佢都好捨得用嚟燉湯畀大家飲,我就親身試過佢個黃耳燉湯,用新鮮嘅黃耳燉湯,湯頭有好濃郁菇菌味,啲黃耳好滑好軟身,分量堅多,食素嘅地方好少會出燉湯,呢款「迷湯」超受歡迎。個 Portabello 大磨菇我都好 like 㗎,個菇焗得好香,但又唔會變成乾柴,最正係上面啲番茄好好肉又清甜,炒得好有香草香,眨個眼就畀我吃光光啦。

始終我係平日都食葷,太淡口味嘅素真係...,但呢度做嘅素食,無咁抽離,我哋一樣會喺度食到香口嘅 Taco,不過材料變咗芒果同生果;餐前仲有「叉燒」食㖭,個叉燒堅堅堅好味,係豆製品,唔係加工素肉,用秘製醬汁焗好後再塗麥芽糖焗,甜甜地,味道唔輸蝕畀真叉燒。

我仲要講,Ella 唔鍾意用太多素肉,因為都係預製過,成份不明,怕用嚟煮素有違健康原則,寧願用多啲新鮮材料做素,仲用台灣蔬果味素及台灣素醬料調味,咁啲素夠味之餘又唔油膩,仲無奶無蛋不用白糖,適合全素人士食㗎。食過好吃嘅,啲醬料同部分有機食材仲可以買走,我都忍唔住手,買咗唔少返屋企孝敬爸媽。

P.S.:差啲唔記得講,呢度午巿都好抵食,啲客飯、意粉、藜麥麵套餐都係 50、60 元,日日新款,食多幾餐都唔會悶。

六道菜私房菜 $300 位(四位起、須早一日預訂)

I Vegetarian

地址:觀塘成業街 19-21 號成業工業大廈 2 樓 24 室
電話:3565 5203
營業時間:星期一至五 12nn - 3pm、6:30pm - 10:30pm,星期六及日只供預訂
備註:1. 只收現金,不設加一
2. 星期一至五設午巿套餐
3. 私房菜於星期一至五晚巿、星期六日供應,星期六日用餐時間可與餐廳商議

想睇更多?即上 素菜 特集!

歡迎你 like 我哋 U Food Facebook Page / U Food Instagram ,取得我哋更新更快嘅資訊!

↓【限時搶⚡】日清盈優青汁套裝!↓

↓ 日本製造 / 清爽蘋果味、濃厚白桃味 / 有助維持腸道及皮膚健康!


↓【出Post賺現金賞】《社群》助您發展創作者事業↓

↓透過發佈帖文賺取收入!立即參加!↓

more