小儀:真係威!血鴨證書

發佈: 2015.11.17
文:

母親大人時常提醒我,沙紙要攞多幾張,我一直記住喺心㗎!連食餐飯,我都唔放過攞到証書嘅機會,係咪奮進青年先?呢張沙紙得來不易,要將個胃豁出去,食晒法國名菜──血鴨(Canard au Sang)先得到。

大家都知「血鴨」係鼎鼎大名嘅矜貴法菜,由巴黎嘅超級名店 + 米芝蓮餐廳 Tour d'Argent(銀塔餐廳)喺 19 世紀創作,經典度係差利、瑪莉蓮夢露同伊莉莎白泰萊呢啲級數嘅名人都覺得吔過先至等如去過巴黎,之前香港都係得 Le Parisien 同 La Brasserie 兩間高檔法菜館曇花一現過,呢度咁講究咁刁鑽的菜式,自從 La Brasserie 結業,香港都無得食囉。

不過,上天憐憫為食鬼,當年 Le Parisien 嘅大廚 Pascal Breant 決定將呢個重現,圖中個位高大靚仔咪就係佢囉。好耐之前,我喺 Le Parisien 試過佢嘅血鴨,失散咗好幾年,我又係呢間餐廳搵返佢,仲重演返當年吔血鴨呢幕。

食血鴨,一定要搵 Pascal 喎,因為佢喺 Tour d'Argent(銀塔餐廳)工作過,絕對系出名門。原來唔係款款鴨都叫得做「血鴨」,規定用咗嚟自國 River Loire 嘅 Challandais 嘅鴨仔先得,真係要 8-10 周大嘅「鴨仔」喎,老過呢個歲數嘅「鴨佬」就唔得;仲要 free range,晒慣太陽食 River Loire 嘅水草大先得喎,因為要留返啲鴨血,劏時唔可以放血,超超超刁鑽。

食血鴨嘅戲肉,梗係睇即場榨鴨血汁,大家唔好誤會喎,食血鴨呢件事一啲都唔血腥,只不過係將鴨背骨連埋骨髓放入我旁邊嗰個銀色壓鴨器度壓出骨髓同血,要再加干邑、砵酒、鴨肝同濃雞湯煮先食得,Pascal 話傳統嘅 100% 銀製壓鴨器要成 100 萬,佢呢個鍍銀鋼膽嘅壓鴨器都要 10 幾萬,佢真係為咗喺香港重現呢度菜訂返嚟,聽到都戥佢肉赤赤。

唔講得笑,我真係未食過咁濃郁嘅鴨肉,濃味直迫鵝肉,但嫩滑無渣,鵝真係行埋一邊,嗰汁醬都係一絕,濃得嚟有酒香有肝嘅味道,好啱入秋同冬天食,一鴨仲係兩食,一道係鴨胸、另一道係炸鴨腿,鴨胸旁邊個 Soufflee potato 空心薯球都係一絕,超脆超有薯仔香,香港「乸」埋都未必有多過 5 個法國廚識做。最威威係食完就有 Pascal 簽發嘅証書,而且有編號架,証明你食過呢樣法國好菜。

呢度嘅血鴨價錢仲平過 Le Parisien 年代,血鴨有幾尊貴同正,齋睇我專欄都係 food porn 唧,有得眕睇無得食,都係親身嚟攞張沙紙好過。

Alchemy

地址:中環亞畢諾道 16 號地下
電話:6821 2801
營業時間:星期二至五 12nn-2am,星期六 11:30am-2am,星期日 11:30am-4:30pm,Happy hour 星期二至五 3pm-9pm,逢星期一休息
備註:欲惠顧血鴨,請早 1 日前預訂

想睇更多?即上 中區 特集!

歡迎你 like 我哋 U Food Facebook Page / U Food Instagram ,取得我哋更新更快嘅資訊!

↓【社群送禮】麒麟一番搾啤酒及禮品套裝!↓

↓麒麟一番搾啤酒杯/櫻花富士山杯/櫻花玻璃碟↓


↓【出Post賺現金賞】《社群》助您發展創作者事業↓

↓透過發佈帖文賺取收入!立即參加!↓

more