土炮瘋狂熱狗

發佈: 2015.12.05
文:

而且配搭仲係前無古人咁爆炸級,食厭咗芥末洋葱同茄汁,終於有機會改寫口部命運。

是咁的,我會形容呢間係勝利道德國熱狗嘅「土炮」版,意思唔係話舖頭賣茶記級數嘅小食熱狗,而係廚師將香港元素放入熱狗同小食度。最令記者理智綫拆斷嘅,一定係每月彈出嚟嘅新款熱狗——「臘味鵝肝腸狗」莫屬,用膶腸確係真心破格,不過人家由揀料到配搭都十級認真。唔使驚,膶腸絕對唔係神級膠製的大陸貨,特別找上環老字號和興號本地生產的鵝肝膶腸,玫瑰露味超香,加埋甘香嘅膶味,齋食都幾正㗎,廚師居然仲諗到用牛油果醬配膶腸,牛油果醬滑滑地,味道唔濃,同膶腸合晒合尺,最聰明還是用蕎頭碎代替「老馮」嘅洋葱,酸酸甜甜又有少少辣勁,目的明顯為減少膶腸嘅油膩感啦。

其他「土炮」版本嘅熱狗都值得一吃,好似左邊嗰隻真係要出動筷子吃嘅「麵狗」,麵條係香港仔有記出品、上面的炸白飯魚仔係找人每月由南丫島老字號南陵金卷親手拿回舖;仲有「腐乳狗」,所用的腐乳都係流浮山順記的出品,全部 made in Hong Kong,土炮風味極濃郁。

無腸不成熱狗,呢度嘅香腸都係高檔貨,有煙燻辣腸同福蘭克福腸 2 款任揀,兩款腸腸衣都超脆,唔會鹹到味覺失靈,個人推介煙燻辣腸,因為好難得真係食到辣勁,一啖土炮癲狗,一啖可樂,你話每日一治幾鬼爽?

麵狗 $39
真係太離譜了,成個撈麵放喺熱狗頂,真係要用筷子食先得。原來這熱狗是呼應返店名 Noodle and dog 而設計,所以有麵也有狗,麵是舖頭的招牌冷麵,以自家調製的芝麻沙律醬調味,下面墊有紫洋葱、火箭菜同熱狗腸,最正係熱狗面撒上南丫島南陵金卷出品的椒鹽白飯魚,令熱狗多了脆脆口感。

牛油果鵝肝腸狗 $69
真係一款瘋狂的熱狗,出現原因係由於秋風起,廚師就諗到麵包夾鵝肝腸。每隻有一條切了片的膶腸,膶腸酒香馥郁,入口粉粉又有油的甘香,最瘋狂是配了帶脂肪的牛油果醬,膶腸與牛油果全無違和感,加埋上面加了嘉咸街順記製的蕎頭粒,平衡油膩感。

腐乳狗 $39
最特別是自家調了個腐乳沙律醬,沙律醬有點酸、有點鹹香,有啲似芝士醬,我仲 like 佢加咗香口大味嘅京葱,建議選埋辣味熱狗腸,成件事又香又辣又重口味,comfort 感超強。

Noodle and Dog

地址:上環皇后大道中 237 號 B 舖
電話:9856 4494
營業時間:10am-8pm,星期日及公眾假期 11:30am-6:30pm
收費:只收現金,不設加一
交通:港鐡上環站 A 出口,步行 5 分鐘
泊車:新紀元廣場 $27 hr
平均消費:$39

相關報導:
烏卒卒全日早餐治
大鮮肉辣雞窩夫治
窩夫夾芝士蟹
肉食男女與厚片豬排治
搞錯!雞翼懶人包

歡迎你 like 我哋 U Food Facebook Page / U Food Instagram ,取得我哋更新更快嘅資訊!

↓【限時搶⚡】Ísey Skyr健康冰島乳酪套裝!↓

↓ 使用比普通乳酪多近4倍的牛奶!/ 好像Gelato義式雪糕一般的口感!↓


↓【出Post賺現金賞】《社群》助您發展創作者事業↓

↓透過發佈帖文賺取收入!立即參加!↓

more