藝術館過聖誕——ATUM

這位大廚，作風一向破格，去年開設的甜品店 ATUM Dessertant，憑席前即製甜品畫一炮而紅；上月踩過界，在 K11 開餐廳。主打北歐風料理，看重時令和本地食材，並加入 Bong 的個人創意，菜式靈感天馬行空，烹調結合各國和分子方法，賣相與他的甜品畫一樣驚艷。

裝修更特別，一室黑白灰冷調，水泥地板雲石枱面，黑色天花板掛着白色樹枝，好型好酷；2,000 呎地方，只放少量座位，門口辟出敞大空間，放裝置藝術品，projector 在牆上投映幾何圖案，似 gallery 多過餐廳！

在 gallery 過聖誕會如何？餐廳的首個節日，以 reconstructed 為主題，以癲覆傳統再創造為口號！套餐的每道菜，都刺激視覺和味覺！像海鮮拼盤，不以冰鎮，人手即席在黑板上堆砌，似幅畫！生蠔上有自製柚子魚子，三文魚以紅菜頭醃過，蟹肉拌煮過的菊花，還有青檸帶子和柚子池魚，以橄欖油粉末點綴，入口才發現驚喜重重。聖誕主角火雞也經「再創造」，由低溫開始燒五六小時，不乾嚡；更反傳統手撕，伴小椰菜藤茄甘筍無花果吃，像個豐富 warm salad，也像個繽紛花圃，比傳統火雞吸引百倍。每道菜，本身就是一件藝術品。

甜品是另一個高潮，有十多款任吃！不同口味的朱古力、cupcakes、mascarpone tart、蛋白餅、roll cake 在 open kitchen 中列陣晒冷，每款都做成一口 size，精巧的骰，擺設好有美感！這邊廂忙住相機食先，那邊廂仲有甜品 show 睇！由甜品廚師即席表演，炮製散點 menu 中所有甜品，有時唧忌廉，有時加果醬，有時砌水果，每場 show 都想看，每款都想吃，進進出出，比一般聖誕餐逐道菜上有趣互動得多。

聖誕期間，餐廳不會增加座位，反而放一棵 7 呎高的白色聖誕樹，增加藝術感之餘，更讓大家欣賞 selfie post 上網。「去扒房鋸扒，要坐定定。在這裏，可以周圍逛，邊睇邊吃邊影。Christmas 係開心節日，應該輕鬆啲！」Bong 說。

有時，節日的驚喜，就是從反傳統開始。

Pavlova
蛋白脆餅入口脆脆的，原來是軟心的！撒上乾身紅桑莓和配士多啤梨，酸咪咪；吃時加一球液態氮紅桑莓雪或朱古力雪糕，氣氛滿瀉！

Christmas Turkey with Brussels Spouts, Turkey Stuffing（主菜）
火雞用傳統方法由低溫開始燒五六小時再手撕，嫩滑不乾，充滿香草味；配菜有焗澳洲甘筍、蜜糖無花果、烘脆的 Parma ham 和紅莓汁，酸甜甘鹹脆，精采。

Mascarpone Tart
有綠茶和青檸口味，清香幼滑，撻底牛油香十足，一口一個好滋味。黑色像石頭的，入口才知是 honeycomb 和芝麻蛋糕，過癮！

Signature Seafood Platter（頭盤）（二人分量）
如畫的海鮮拼盤，每款海鮮都經精心炮製；三文魚，魚味中帶紅菜頭甜香；帶子和池魚分別以青檸和柚子醃過，清酸突顯鮮甜；蟹肉用加拿大蟹加本地蟹，拌以菊花和醬汁，清香；法國 White Pearl 生蠔上有香檳啫喱，加自製魚子珠珠，可以是熱情果、士多啤梨、辣椒、薑、青檸和 white balsamic。伴橄欖油粉末和墨汁脆片吃，加添玩味。

Christmas Gluhwein
德國聖誕 classic 飲品，以熱紅酒加肉桂、丁香、香草、橙汁和橙皮煮成，香甜中帶濃濃香料味，喝罷暖笠笠。

ATUM Restaurant
地址：尖沙咀河內道 18 號 K11 一樓 101 號舖
電話：3586 1959
營業時間：星期日至四 11am-10pm，星期五及六 11am-12mn
收費：現金及信用卡，設加一
交通：港鐵尖東站 N4 出口
泊車：鐵路大廈 $25/hr
平均消費：$400
註：
1. 聖誕套餐於 12 月 24 至 26 日晚上供應，包頭盤 Signature seafood platter、Foie gras soup、三選一主菜、半自助甜品和飲品 Christmas Gluhwein。
2. 每位 $628-$688，價錢視乎所揀選主菜而定：Honey glazed ham with chestnut cranberry $628/ 位；Slow cooked Norway salmon with horseradish cream, roasted fennel and orange salad $658/ 位；Christmas turkey with brussels sprouts, turkey stuffing $688/ 位，設加一。
3. 聖誕期間午市設散點，餐單內會加入聖誕菜式。

相關報導：
獻給所有人的難忘約會——VEA
滿足 N 個聖誕願望——Alma

想睇更多？即上 聖誕節 / 聖誕自助餐 特集！

歡迎你 like 我哋 U Food Facebook Page / U Food Instagram ，取得我哋更新更快嘅資訊！