全港首創 立食分子Bar

發佈: 2015.12.19
文:

最近呢個空缺終被填補了,就係開在銅鑼灣禮頓道嘅 Three Dice Kitchen。

品牌去年成立,主打分子料理到會或上門餐飲服務。創辦人 Arthur 見反應好,於是再下一城開設實體店,店子只可容納約 12 人,不設座位只有立食,Arthur 話:「見日本好興立食,雖然無位坐,但因為可做多幾轉客,價錢相對可以平啲,寧願將成本放晒落食材度。」

價錢的確令人喜出望外,目前只供應 6 道菜晚餐,竟然 $200 就可食到,仲要不收服務費!只要預先 book 位再在指定時段來,就可以好似睇表演咁在 chef table 邊睇邊食。前菜哈蜜瓜分子晶球配西班牙黑毛豬火腿,廚師會在客人面前將打成蓉並加入海藻酸納的哈蜜瓜果蓉浸綠化鈣水凝結成球體,食液態氮酸忌廉冰球時又會即席將酸忌廉加入液態氮酸變成球體再釀入薯仔及煙三文魚粒,食時可自己扑開;食煲仔鮑汁神戶牛面頰西班牙飯時又會附設放了魚缸泵的蒜香忌廉泡給客人自行調味,好食又好玩!不要以為菜式都是只為打卡的視覺系產物,店子用料也優質,ham 用 45 個月黑毛豬、牛面頰用神戶種的澳洲貨、鮑汁又用品味香江的鮑魚熬,性價比相當高。

煲仔鮑汁神戶牛面頰西班牙飯配分子蒜香忌廉泡
意大利米先用自家熬的鮑魚汁燴過,放入中式煲仔裏再用焗爐焗製,做到了裏面飯粒入味水潤外層有微脆飯焦的效果。牛面頰是神戶牛種澳洲飼養的貨色,用鮑汁煮過,軟腍入味。

有氧無皮革車厘茄浸日本柚子醋
將已去皮的日本車厘茄注入二氧化碳再浸在日本柚子醋中,食落酸咪咪,非常開胃,而且仲好似飲汽水咁不斷有氣在口腔湧出,好盞鬼。

煙燻真空慢煮雞胸配牛肝菌脆粒
法國雞胸肉輕輕的用香草及海鹽醃過以約 62 度慢煮 40 分鐘,再灑上牛肝菌脆粒提味。上枱前用煙槍注入用橡木及 rosemary 燒成的煙,充滿視覺效果味道又更香。

Three Dice Kitchen

地址:銅鑼灣禮頓道 136 號希雲閣地下 2 號舖
電話:9811 1880
營業時間:2pm-11pm (目前 7pm 及 8:30 供應 6 道菜晚餐開始時段,其餘時間供應乳酪甜品)
備註:只收現金,月尾開始接受信用卡

(原文摘自 U Magazine ISSUE 525)

想睇更多?即上 銅鑼灣 特集!

歡迎你 like 我哋 U Food Facebook Page / U Food Instagram ,取得我哋更新更快嘅資訊!

↓【限時搶⚡】Kilo Calo慢煮即食雞胸套裝!↓

↓ 雞胸經低溫慢煮烹調!/ 提供研製多時的獨特口味!↓


↓【出Post賺現金賞】《社群》助您發展創作者事業↓

↓透過發佈帖文賺取收入!立即參加!↓

more