半世紀心血,潮洲打冷。

發佈: 2015.12.25
文:

這間「寶益」,由兩兄弟阿文阿武齊心經營,附近大多是地痞小店,相對店內環境出奇地企理乾淨。我一個人來會點星期一至四全晚供應的特價套餐,$48 就食到鹽焗雞,套餐包潮式例湯、潮州粥或白飯。4 人套餐都好抵,自選 2 款打冷及 2 款小菜,埋單每人夾七十零蚊而已。我幾欣賞呢度個蠔餅,蠔肉有肉地,炸得極脆,不至於一口粉。蒸烏頭也唔錯,採用元朗楊氏烏頭,魚味鮮濃,沒泥味。一大碟 $78 的滷水鵝先最抵食,選用 8-9 斤重潮州獅頭鵝,肉質結實,鵝味濃厚。

「個滷水汁我加入咗廿多種香料去煮,有南薑、香茅、花椒、八角等,滷水膽已經有 6 年,每日添新汁再煮。滷水秘方沿自阿爺年代,阿爺早於 57 年,已經在坑東屋村樓梯口開滷水檔起家,其後輾轉在九龍城巷仔、牛下擺排檔。到 90 年代爸爸接手,落戶新蒲崗入舖,成為一家人的飯堂,留下好多開心回憶。阿爺同爸爸係典型潮州漢子,不畏艱辛,由做滷水斬鵝,到 sell 客,一手一腳搞掂。」家族第三代細佬阿武說。

8 年前,兩兄弟在觀塘接棒經營茶餐廳,賣打冷小菜,可是半年前不敵業主加貴租,迫使他們轉戰現址。「我哋每日親自去大成街、花園街街市買海鮮,唔靚唔買;大眼雞、豬大腸,唔新鮮唔要!凍蟹無乜肉,寧願唔賣!雖然係小店,但我哋好堅持做好出品,傳承阿爺同爸爸半世紀以來的事業。開食求預咗瞓晒身,我地無娛樂,無朋友,依家只有一個信念──今次重新開始,一定唔可以輸!」大佬阿文說。

來食宵夜,跟他們打牙骹,聽他們講下做食店的苦與樂,好體會到潮州漢子打不死的剛強本色。

金勾銀柳 $80
新派潮式小炒,混合自製魚麵、鯪魚肉、瑤柱、粉絲,魚麵夾雜墨魚及鯪魚味,粉絲好清爽。

招牌滷水鵝 $78/ 例牌
獅頭鵝厚肉味濃;皮較薄,滷得入味。滷水汁味道香醇。

蠔仔餅 $50
蠔肉大隻,肥美鮮味。炸得脆口,就算攤耐了都好脆。

潮式元朗烏頭 $88
皮與肉之間有層黃油,香潤甘甜,魚肉厚身,富彈性。

欖角骨 $65
新式做法,炸豬扒伴以欖角、燒汁、蜜糖和糖醋,豬扒掛上甜蜜芳香,滲開胃微酸。

寶益潮州打冷小菜

地址:太子基隆街 15 號地下
電話:2338 7238
營業時間:5:30pm-2:30am
收費:只收現金,不設加一
交通:港鐵太子站 D 出口
泊車:別樹一居 $32/hr
平均消費:$100

歡迎你 like 我哋 U Food Facebook Page / U Food Instagram ,取得我哋更新更快嘅資訊!

↓【社群送禮】麒麟一番搾啤酒及禮品套裝!↓

↓麒麟一番搾啤酒杯/櫻花富士山杯/櫻花玻璃碟↓


↓【限時搶⚡】Louiscocoa鳳梨啤酒口味可可即沖營養代餐奶昔!↓

↓ 首創含微量酒精代餐 / 嚴選高級可可粉 / 加水即沖即飲!↓

more