好大鑊!韓系火燒芝士雞

發佈: 2015.12.27
文:

此店主打 5 款鐵板料理,以芝士風味雞最受歡迎,其餘是炒雞肉、炒牛肉、炒烤豬肉及辣醬炒豬肉。每張餐枱均設置直徑 45cm 的圓形大平底鐵板,由韓國「昂巴」席前製作。我係超級芝士精,梗係要試芝士風味雞啦!

首先,「昂巴」會推車送來生料,將所有材料,包括雞肉、韓國年糕、紅蘿蔔、番薯、椰菜、金菇、大葱及洋葱,連自製辣醬,放鑊內一齊炒勻。期間用火槍不斷加火,令雞肉面層掛上焦香。最後,加入芝士碎,待芝士融化,就可以夾起雞肉,蘸芝士來食。雞肉香辣帶甜,入味富彈性;芝士濃厚黏稠。客人更可追加拉麵、烏冬、炒飯、年糕!我見鄰枱少女食客好 auto high,將芝士拉扯鬥高,拿著手機狂拍,呢個場面已經夠好睇。

「我去過韓國試過多間名店的春川雞,參考每間做法的優點再融會為一。我先將巴西雞肉去皮去筋,然後用礦泉水加牛奶,好似浸 spa 咁浸 5、6 個鐘。礦泉水分子細,易滲透,令雞肉充份吸收牛奶的潤滑﹔再用韓國麥芽糖、辣椒粉、蒜蓉等十多種香料,混成的辣汁醃足一日至入味。我對食材好挑剔,每日來貨一定會試。我食雪藏雞,食到朕雪味會反胃,所以花盡心思研究醃肉秘技。」韓籍老闆娘陳小姐說。

嫌鐵板料理太 heavy,可以點其他較 light 的沙律、拉麵、炒鳳爪、海鮮鍋巴湯!

鐵板芝士風味雞 $299/ 2 人份
老闆娘提示正宗食法,就是芝士一直放中間,夾起雞肉蘸芝士,芝士味夠突出。而辣度有大、中、普通、小辣之分,普通辣都幾辣下!

烤牛肉沙律 $145
牛肉帶甜又入味,加上溫室豆苗、外國雜菜及車厘茄,配以自製蜜糖芥辣醬同食。

一雞兩味 $170
即原味和辣味,炸漿脆透,辣味較惹味,灑上花生碎,更香口。襯上薯條,邪惡之最!

Big Pan 大大鑊鐵板料理
地址:尖沙咀厚福街 8 號 H8 11 樓
電話:2311 1601
營業時間:11am-3:30pm,5:30pm-1am(last order 11:30pm)
收費:現金及信用卡,設加一
交通:港鐵尖沙咀站 B2 出口
泊車:加拿芬廣場 $31/hr
平均消費:$180

相關報導:
半世紀心血,潮洲打冷。


重慶紙包魚,滑過烤全魚

想睇更多?即上 尖沙咀 特集!

歡迎你 like 我哋 U Food Facebook Page / U Food Instagram ,取得我哋更新更快嘅資訊!

↓【限時搶⚡】MG Spirit西班牙清新水果酒!↓

↓ 獨特微醺體驗 / 西班牙釀製 / 天然新鮮果汁混合5.5%酒精伏特加!↓


↓【出Post賺現金賞】《社群》助您發展創作者事業↓

↓透過發佈帖文賺取收入!立即參加!↓

more