因為呢度嘅cocktail 同食物，擺脫了洋人影響，以香港本土情懷融入當中，杯杯酒品、碟碟美食都 surprise 度十足。
中環餐廳酒吧唔少，但八九成都係 cocktail 搞得掂，食物就唔掂，這間新開的餐廳酒吧飲與食兩邊都做得不錯。舖頭名字已見玄機，Bao Bei 裏的 Bao 指「包」、Bei 音「貝」，跟「杯」同音，擺明又賣包、又賣一杯杯的飲品，原來它是灣仔刈包專門店 Bao Wow 的姊妹店，Bao Wow 口碑不俗，有姊妹硬撐，這裏的食物水平有保証，新加埋有新玩法的 Bei「飲杯」部分，睇圖都覺得有新鮮感。
而家啲 cocktail 興又點火、又噴煙，但在這裏不會找到無謂的 grimmy，這裏的雞尾酒由 店主 Gerald 及 Wendy 創作，二人是土生土長的香港人，就將土炮童年回憶同亞洲元素做 cocktail，舖頭有 10 款創意 cocktail， 當中最令人躍躍欲試的，一定是用所有香港細路都愛飲嘅樽裝維他奶做的雞尾酒，二人諗到維他奶加 Bailey's 酒，飲落維他奶口味與口感無走雞，不過維他奶即時大個仔，成人限定。颱風常常橫掃香港，調酒師就諗出一杯 Typhoon No.10，唔止酒精加咗香港人甚為 like like 嘅桂花，仲盏鬼地放咗把兒時啫喱必備的小小紙傘，還要是被吹翻的樣子，鬼馬到佢呢？。
仲有賣相令人看輕其殺傷力的楊枝甘露 Mango Pomelo Sago 及酒精版阿華田 Sweet Dreams，前者實際卻係加咗白冧酒嘅沙冰版，後者則加咗一串可愛嘅燒棉花糖掩飾用伏特加加料，看輕它一杯下肚，分分鐘會 wing wing 哋。另外，還有用紹興酒、柚子清酒、燒酎、青木瓜、斑蘭葉浸雪莉酒等亞洲元素做 cocktail，新鮮感構成相當吸引力。
連店名都以 Bao 行頭，當然必吃鎮店的蒸包，唔好以店主二人會偷懶，將 Bao Wow 的包包移植過來便算，今次來了個升級版，bao bao 自家製，仲搞鬼地變出傳統刈包、包漢堡（Baoger）同包文治（Baowich），最正係用料升級，配料由豬腩肉、魚柳、漢堡扒升格成神戶豬腩肉、金沙炒街巿魚及用和牛做漢堡扒等，連配料都改頭換面混入亞洲血統，如 homemade 杏脯莎莎、蒜香青瓜、梅味沙律醬、仲有 XO 醬、味噌、木耳等，混咗血啱晒配相當有港土特色的 cocktail。
Bao bao 以外，仲有好唔少變種中菜，好像由芝士龍蝦伊麵演變成「一口咬」size 的虎蝦雲吞、用上華麗神戶豬肉做的意式滷肉飯、被韓風吹過的 Carbonara 年糕、連甜品都有啲酒樓改良 feel，以新鮮藍莓醬及熱情果醬配大良炸鮮奶，鮮奶變成細細粒，一口一件，中菜即時潮咗 10 倍，呢度確係有賣點約班 friend 嚟飲嘢。
Bao Bites Trios $128
蒸包三味，細細件奶適合送酒，包括 XO 醬和牛、味噌鱈魚及辣椒醬鵪鶉 3 款口味。
Childhood Memory $118
最爆是以麥精維他奶樽上枱的雞尾酒，真係用維他奶加上白冧酒及百利甜酒調成，甜甜的，酒精度不算太高，係成年版的童年回憶。
China Town $138
雞尾酒以苦橙酒、Rosso Vermouth 酒、桔仔及紹興酒調成，以茶杯上好有型。
Typhoon No.10 $158
靈感取自香港常有的颱風，以 Tanqueray No.10 氈酒、桂花密、橙汁及檸汁等調成，上面有蛋白打成的泡沫，更配了桂花啫喱，最盞鬼係放了把吹翻了的紙傘襯應一下颱風意境。
Mango Pomelo Sago $128
唔好以為係楊枝甘露，實情係白冧酒、新鮮芒果、芒果汁打成的酒精版沙冰，上面更放了金柚、西米及芒果肉。
Taiwanese Braised Pork Belly Risotto $128
台式滷肉飯的升呢版，滷肉改以神戶豚腩肉滷，加上磨菇及黑松露醬當意大利飯煮，帶黏度又煙韌，飯粒索晒菇香。
Kobe Pork Belly Bao $88
刈包裏夾着神戶來的豬腩肉，以慢煮方法炮製，再配 Portobello 大磨菇及以杏桃煮出來的莎莎醬，腩肉肥美富油香，配上莎莎醬的酸香，口味平衡。
Shrimp Roe Cigar $138
造型超美，大大碌的春卷裏是刴碎的蝦肉，也有自家炒香的蝦籽，另配蝦籽及泰式雞醬。
Wagyu Beef Baoger $88
饅頭裏夾着自製和牛漢堡扒，配木耳及烤鰻魚汁。
Rice Cake Carbonara $118
卡邦尼意粉的亞洲版，意粉變成切幼的韓式年糕，以中式金華火腿代替煙肉，加巴馬臣芝士連中式砵焗香。
Deep Fried Milk Pudding $78
靚版炸鮮奶，炸水牛奶以傳統方法炮製，不過破格地配了自製的藍莓醬及熱情果醬。
Tiger Prawn Cheese Wonton $118
這是芝士龍蝦伊麵的變種版本，龍蝦改以蝦味更濃及更彈牙的虎蝦製，伊麵則用雲吞片代替，將蝦肉芝士放到雲吞皮上焗香，便成了方便食用的下酒菜。
Sweet Dreams $138
酒底除了伏特加，仲加了阿華田、Godiva 朱古力糖漿、朱奶調成，入落可可味，但入口少少啃，上面還放了串燒棉花糖。
Golden Fish Baowick $82
中式版的魚柳包，以蒸包夾着以鹹蛋黃炒成金沙魚，魚是街巿賣來的時令貨，配脆脆、蒜香青瓜及梅味沙律醬。
Som Tam $138
Cocktail 以竹筒上，好有邵氏武俠片感覺，氈酒加上青木瓜汁、辣椒、胡椒糖漿及新鮮青檸汁調成，好有東南亞的清新感。
BAO BEI
地址：中環雲咸街 77 號地庫
電話：2801 7779
營業時間：5pm-till late，星期日休息
收費：現金及信用卡，設加一
交通：港鐡中環站 D2 出口，步行 5 分鐘
泊車：中央廣場 $32/hr
平均消費：$350-$450
備註：食物最後落單時間為星期一至四 12mn，星期五至六 1am
相關報導：
華麗虛擬 AQUARIUM BAR
想睇更多？即上 中區 特集！
歡迎你 like 我哋 U Food Facebook Page / U Food Instagram ，取得我哋更新更快嘅資訊！
↓【出Post賺現金賞】《社群》助您發展創作者事業↓
↓透過發佈帖文賺取收入！立即參加！↓
↓【限時搶⚡】Louiscocoa鳳梨啤酒口味可可即沖營養代餐奶昔！↓
↓ 首創含微量酒精代餐 / 嚴選高級可可粉 / 加水即沖即飲！↓
