小儀：熱情的鐵蛋沾麵

遇着幾廿年一度嘅寒流襲港，我梗係嚟食熱辣辣嘅沾麵。

唔好噓我喎，我知你頭上面有個問號：明明沾麵係設計，點可能「熱辣辣」？係，你啱一半，喺其他沾麵店未必可以，但呢度就得。亦係我今次幫襯最期待嘅 moment，見唔見羡匙上有隻黑色嘅蛋，其實佢係一粒鐡石嚟，你知啦，我哋呢啲淑女嘴仔細細，食得慢，個沾麵食到一半，個湯已經變冷，呢個時候，快啲請侍應哥哥幫手，叫佢拎呢隻燒到烘晒嘅鐡蛋出嚟。一、二、三準備掉佢落湯度，嘩！粒蛋一落水咋，就好似叫醒咗個活火山，湯底即刻沸騰，仲噴晒煙，視覺效果好震撼唧。

唔好啩住玩，而家寫試食報告先，等我嗒真啲先，有啲朋友可能會覺得沾麵好油好濃，但呢度個味拿捏得幾好，個湯底有魚介味、又係肉嘅鮮味，濃得嚟唔會好鹹。麵條我覺得幾特別，唔會又硬又難"口趙"，反而有少少烏冬嘅柔軟感，唔實有嚼頭，湯同麵條都幾夾，掛到汁。豚角都唔錯，幾入味又鬆化，同坊間啲沾麵比，呢個鹹度適中，幾易入口。

我仲錯有錯着，當我加隻鐡蛋落湯嘅時候，隻鐡蛋唔小心跌正喺豚角上面，辣燶咗件豚角。嘩！即刻焦香味四溢，本來油香十足嘅豚角，而家更加香噴噴，記住學我，下次加鐡石時留返件豚角「煎煎」佢。

畀我發現枱上面放咗日本當地拉麵舖常見嘅 Gaban 牌黑胡椒，嘩！呢隻胡椒超鮮香，去日本食拉麵我一定會落，香港終於有麵舖用啦......真係好滾動呀。連雙筷子都有細心位，筷子前段有「狗牙」凹凸紋，方便「棘」住啲麵條，咁就唔怕啲麵跣嚟跣去，彈起啲湯整污糟衫啦，好關懷淑女喎。

Tetsu
地址：銅鑼灣堅拿道西 23 號地下
電話：2172 643
營業時間：11:30am-11pm

想睇更多？即上 銅鑼灣 特集！

歡迎你 like 我哋 U Food Facebook Page / U Food Instagram ，取得我哋更新更快嘅資訊！