韓國人深知不進則退的道理，所以韓國炸雞界早己開始靜靜起革命，用烤焗的方法取代傳統油炸，雞件的油膩感大減，食多幾件都無罪惡感。
炸雞新員「The Hwaduk」在韓國開業只有 3 年，但分店已經有 30 間，遍布全國，剛在香港開設海外第一間分店，選址銅鑼灣高級食廈 Cubus。食廈間間餐廳人均消費閒閒哋都 4 百，但 The Hwaduk 收費明顯親民得多，炸雞最平 $168，仲有熱烘烘的麥茶讓你暖暖胃，後生仔女都消費得起。
炸雞口味有 7 款，原味分有骨及無骨，亦有 BBQ 醬、蒜味、韓式辣醬伴年糕、香葱及辣胡椒味。餐廳所選用的雞隻是中國的芝麻雞，愛其脂肪少但肉味濃，跟韓國本店所使用的雞隻品種味道差不多。一份炸雞用上足一隻雞分量，但由於每隻雞的重量不會超過 1kg，即使一個人都可以食到一份，約埋朋友來食可以試多幾款味。雖說是「炸雞」，但實際上是「烤雞」。餐廳特別花上 6 位數字由意大利購入以火山岩製成的烤爐，是全港首間使用此爐的韓國餐廳。烤爐以明火加熱，爐內最高溫度可達攝氏 400 度，收到柯打後將雞再入爐烤製，大廚首先會放於近明火位置用高溫將雞烤熟，隨後會每 5 分鐘將雞隻轉換位置，用不同火力將表面烤脆。由於雞隻置隔油網上烤製，不會出現被雞油浸濕的情況，每塊雞件都能夠保持乾身，20 分鐘就可將雞隻完全烤熟。
有意大利烤爐坐鎮，單是用來烤雞太浪費了吧！餐廳還供應 4 款 Pizza，餅底是薄式 style，有以番茄芝士火箭菜為餡料的 Margherita Pizza，亦有磨菇及雞肉 Pizza 等西式口味。拉芝最強的是 Gorgonzola Pizza，餅底鋪滿 3 種意大利芝士，當中有帶藍色斑點的 Gorgonzola 芝士，放爐焗 10 分鐘後，芝士半融，拎起有長長的拉絲，淋少少蜜糖一齊食，中和了芝士的鹹味，芝味十足。
原味炸雞 $168
用了中國的芝麻雞，脂肪較少不會食到成口油，而且肉味濃郁，由於是用了烤爐方法，有助保留肉汁，就算是雞胸都不嚡口。
辣胡椒味炸雞 $178
原味以外最受歡迎的口味，沿用韓國本店的胡椒醬汁，辣味不是即時湧現而是緩緩於喉嚨滲出，香辣刺激。
Gorgonzola Pizza $118
3 款意大利芝士焗至半融狀態，當中 Gorgonzola 芝士味道鹹香又 creamy，加少少蜜糖同食，甜味鹹香有齊晒！
炸雞及八爪魚拼盤 $268
打開餐牌樣樣都想試？點個拼盤就可以解決問題！有半隻原味炸雞、原隻炸八爪魚、3 件紫菜飯球及一大堆炸薯角，八爪魚不會炸到又硬又乾，火候控制得宜。
辣海鮮湯 $168
大蝦、青口、魷魚、蜆以韓國本店空運的辣醬煮成，辣度及味道都跟足韓國，放於海鮮下的烏冬盡吸辣湯味，食到滿頭大汁。
The Hwaduk
地址：銅鑼灣開平道 1 號 CUBUS 21 樓
電話：2811 8821
營業時間：12nn-3pm、6pm-12mn
收費：現金及信用卡，設加一
交通：港鐵銅鑼灣站 F1 出口
泊車：禮頓中心 $24/hr
平均消費：$200
歡迎你 like 我哋 U Food Facebook Page / U Food Instagram ，取得我哋更新更快嘅資訊！
↓【出Post賺現金賞】《社群》助您發展創作者事業↓
↓透過發佈帖文賺取收入！立即參加！↓
↓【限時搶⚡】Louiscocoa鳳梨啤酒口味可可即沖營養代餐奶昔！↓
↓ 首創含微量酒精代餐 / 嚴選高級可可粉 / 加水即沖即飲！↓
