小儀:雨季暹羅俱樂部

發佈: 2016.03.08
文:

我飛泰國,又點夠身邊班貴婦人朋友多,呢班少奶奶高推我去曼谷一間新潮泰菜店,仲指明我要黃昏時段嚟,先碌下草地歎泰式 cocktail,之後再去吃超精緻泰國餐,佢哋話係呢啲係 100% 嘅貴婦人享受。

呢間正嘢叫 Issaya Siamese Club,泰文譯返中文係「雨季暹羅俱樂部」,班貴婦人咁高度推介,搞到我都好想去試,不過原來而家已經唔使飛咁遠啦,落轉銅鑼灣就歎到貴婦人享受。據朋友實測,個 retro 感覺同泰國古宅總店有 8、9 成似,係欠個草地同香草園唧,不過土地問題,無計啦。

Issaya Siamese Club 攞過奧斯卡‧‧‧‧‧‧飲食界嗰個,佢 2 次獲得「亞洲最佳 50 餐廳」嘅銜頭。大家都知泰國農作物幾豐富㗎啦,舖頭係第一批將 farm to table 加埋同西餐 fusion 兩個概念引入嘅泰菜館,佢喺東南亞咁紅,咪就係呢個原因。

資料唔講咁多啦,一於講下食後感。(上心下心 mode)我講個秘密畀你哋知,但唔好話畀其他人知喎,我怕瘀呀‧‧‧‧‧‧。今次呢餐裏面,我有好多食材都未食過,好似香蕉花、棕櫚芯,炸咗用嚟做沙律,棕櫚芯食落有啲似椰子肉,但爽脆啲、清甜啲。香蕉花仲勁,係以前泰王餐單裏面其中一種食材,混起沙律同青糯米入面,加埋椰糖、青檸汁、辣椒同魚湯做嘅醬汁,全部都係新世代嘅 super food,健康食唔肥,怪唔得咁多貴婦人拾卜。

唔使擔心,嚟呢度一樣有食得飽嘅,好似紅咖喱煙燻三文魚、馬沙文咖喱羊膝、火焰燒雞、烤豬肋骨,連素菜都有唔少。當中不少都混合咗鬼佬煮法,好似圖中喺客人面前燒着椰殼碎「放煙」煙燻嘅三文魚、以 slow cooking 方法處理嘅肉類,擺設又靚到咁,唔 like 都唔得。

佢哋仲有一招對女性必 work 嘅殺着,就係好齊全嘅泰式 dessert menu,米雪糕、苿苿莉 panna cotta、香蕉泡芙條,全部由泰國街頭甜品變種而成,難怪班貴婦人 friend 個個食到嗌:阿萊阿萊~~ 確灌卡咁 ~。

Issaya Siamese Club

地址:銅鑼灣登龍街 1 號金朝陽中心二期 25 樓全層
電話:2154 3048
營業時間:(主用餐區)星期日至四 11:45am-3pm、6pm-12mn,星期五、六、假期及前夕 11:45am-3pm、6pm-till late
(酒吧區)11:45am-till late

歡迎你 like 我哋 U Food Facebook Page / U Food Instagram ,取得我哋更新更快嘅資訊!

↓【限時搶⚡】Kilo Calo慢煮即食雞胸套裝!↓

↓ 雞胸經低溫慢煮烹調!/ 提供研製多時的獨特口味!↓


↓【限時搶⚡】Louiscocoa鳳梨啤酒口味可可即沖營養代餐奶昔!↓

↓ 首創含微量酒精代餐 / 嚴選高級可可粉 / 加水即沖即飲!↓

more