小儀:潮菜大師懷舊菜

發佈: 2016.03.15
文:

今日我要介紹畀大家嘅,就係企咗喺潮菜 30 幾年嘅宋炎坤師傅,我敢寫包單,喺佢舖頭食到嘅,出面淨係識叫你食凍蟹、潮州翅嘅「吸水」潮菜館搵唔到㗎。

話說我啱啱開始寫呢個專欄嘅時候已認識到佢,由佢喺銅鑼灣堅拿道西水汕頭榮興、到喺鵝頸橋街巿開自家品牌潮味居,一諗起食潮州菜就搵佢,而家佢搬咗去尖沙咀,我梗係要踩場拾卜下。

宋師傅係法國國際廚王美食會大師級獎章大師,唯靈叔都係佢 fans,佢曉得煮好多傳統手工潮菜,今次我就點晒新加落 menu 啲懷舊菜,因為款款都太特別,我要重點點評推介大家吃。

懷舊繡燒伊麵──咁樣食都係第一次,呢味係兩面黃嘅加強版,喺兩塊伊麵裏面釀蝦膠、大地魚同肉碎,最難係先炸後再用上湯炆到乾一乾身,脆到咔咔聲咁,我一個人都 KO 到半碟啊。

蘿蔔荔茸灌漿──聽師傅講極難做,因為蘿蔔同芋頭溝咗薯粉會出水,你估要包喺薄薄嘅腐皮裏面好易呀?但師傅整到外層超脆,裏面有澱粉香,呢味上枱要即吃,放耐咗就唔脆㗎,嘥咗師傅心機。

酸甜粿肉──唔好被佢平平無奇嘅外表呃咗喎,以為潮菜館無啦啦賣咕嚕肉?實情佢係豬網油包住糖冬瓜、芋頭絲、腩肉絲同薑葱,炸好好有油甘香,班膽固醇之友實 like like 呀。

野生竹笙燉蝦丸──呢款清清哋好好味,師傅話佢好叻做潮州丸,蝦丸又的確一絕喎,好重蝦味又爽口,原來佢落重本用成斤蝦打 30 粒蝦丸,仲要一粒粉都唔滲,你話朕蝦味點會唔濃郁?仲要用埋超高質素嘅野生竹笙,滑溜爽口,連啖湯我都啅埋。

懷舊手工菜以外,我推介要點宋師傅嘅超滑滷水鵝肝鵝片、蠔烙、水瓜烙、綠豆爽清心丸、沙嗲沙茶牛河同太極素菜羮‧‧‧‧‧‧(下刪 10,000 道菜推介),你哋睇下?潮州菜都唔係一定係凍蟹凍魚咁貴嘅,呢度又經濟又實惠,食到飽飽,荷包一樣脹身唔縮水呀。

潮味居潮州海鮮菜館

地址:尖沙咀柯士甸路 18B 號地下(天香樓旁)
電話:2834 6669
營業時間:星期一至六 11:30am-3:30pm、6pm-11pm,星期日及假期 11am-3:30pm、6pm-11:30pm

想睇更多?即上 尖沙咀 特集!

歡迎你 like 我哋 U Food Facebook Page / U Food Instagram ,取得我哋更新更快嘅資訊!

↓【限時搶⚡】Kilo Calo慢煮即食雞胸套裝!↓

↓ 雞胸經低溫慢煮烹調!/ 提供研製多時的獨特口味!↓


↓【限時搶⚡】Louiscocoa鳳梨啤酒口味可可即沖營養代餐奶昔!↓

↓ 首創含微量酒精代餐 / 嚴選高級可可粉 / 加水即沖即飲!↓

more