今年初，尖沙咀凱悅酒店咖啡廳就出新招，自助晚餐破天荒推出任食新鮮龍蝦，賣點一個字──鮮！即叫即烚，那種鮮活滋味，鮮爽彈牙，叫人欲罷不能。
龍蝦是加拿大貨，日日新鮮運到，buffet 開始前，大廚將牠們逐一放上裝滿冰粒的玻璃箱，保持新鮮。
大家可自選心水龍蝦，交由大廚即煮，他會將龍蝦放進滿是檸檬、甘筍、洋葱、西芹及白胡椒的滾水內，像西式白烚煮法，吊起龍蝦鮮味，等大約 10 分鐘就食得。
烚好的龍蝦會開邊奉客，淨食固然好，餐廳更提供 3 款自製醬汁伴吃，個人偏愛柚子豉油汁，酸香鹹辣，比一般豉油富層次；泰式酸辣汁以辣椒青檸汁魚露椰糖等調成，好刺激；還有西式風味的番茄沙沙，令龍蝦肉滑溜又清香。
生猛龍蝦受歡迎，龍蝦粉絲也別錯過凍龍蝦，龍蝦身及龍蝦箝分拆開列陣，等大家各取所需。酒店方面簡單統計，每位客人平均吃掉 2 隻龍蝦（包括新鮮龍蝦及凍龍蝦），大概一晚就消耗接近 350 隻龍蝦，非常驚人，想食還要預早一星期訂位。
自助餐還有很多即製美食，包括即烤靚扒、日式串燒，鐵板鵝肝等，甜品以「可可．創意」為主題，由酒店首席餅師 Gary 創製多款精美朱古力甜品；食完龍蝦再嘗朱古力，從鮮味到甜美，滿足了。
咖啡廳
地址：尖沙咀河內道 18 號香港尖沙咀凱悅酒店大堂樓層
電話：3721 7700
自助晚餐供應時間：星期一至五 6pm-10pm，星期六、日及公眾假期 6:30pm-10pm
收費：星期一至四，成人$578/位、小童$289/位；星期五至日、公眾假期及前夕，成人$638/位、小童$319/位，設加一
相關報導：
龍蝦打孖 Big 到爆！
細細粒！變身Tasting platter
無處不在！龍蝦乜乜乜
歡迎你 like 我哋 U Food Facebook Page / U Food Instagram ，取得我哋更新更快嘅資訊！
