小儀:上樓龍蝦大啖咬

發佈: 2016.03.29
文:

點解我突然咁霸氣?咪就係我揸住對自己好啲隻宗旨做人囉,收工梗要去食餐好。唔知呢期做乜,龍蝦突然好紅,聽聞呢間舖呢期好 hit,睇 U Magazine 之前嘅報道,形容為「暖男賣龍蝦」,亮點處處,唔踩下場我都枉為港島人。

好嘞!係時候將呢度嘅亮點逐一品評。亮點一:氣氛。原本以為主攻龍蝦,地方一定拘拘束束,但上到嚟,我即刻對呢度有好感,原來餐廳模仿外國嘅 fish market,型格 causal,枱凳又放得鬆動,落手攞起大大隻龍蝦箝大啖咬,都唔怕畀人笑失禮,爽呀。

亮點二:大堆頭!我經常被食鬼上身,雖然我唔係大胃王,但最怕叫啲嘢食奀吱吱,唔夠我攝牙罅。嚟呢度就無呢個問題,個招牌「龍蝦匯」真係勁大堆頭喎,一套有齊烤蒜蓉牛油龍蝦、大大個 lobster roll 、熱到飆煙嘅龍蝦石鍋烏冬、沙律同薯條,賣相已經超誘惑人啦,我手上隻龍蝦箝拆開啖啖肉,勁重牛油香味:我仲要讚下個 lobster roll,大大件咁好慷慨,食完木板上嘅龍蝦都飽晒啦,但個烏冬實在香噴噴,個醬汁好濃海鮮味,筴起箸烏冬,掛晒汁,好滑,仲有好多海鮮配料。

亮點三:有暖男正廚。我要強調,我係讚佢嘅廚藝。斯斯文文嘅大廚哥哥阿山,廚藝了得,佢做過日本料理同 Jamie's Italian,又因為係後生仔,所以偏向做年輕人受落嘅新潮菜式,煮法融匯咗西日,又成日有新嘢推出,嚟多幾次都唔會嫌嘢食物悶。

除咗龍蝦,呢度仲有燴法國藍青口、京風章魚大阪燒、炸魚薯條呢啲香口正嘢,4 月佢哋仲加 pop up 咗櫻花 product,由成朵櫻花喺瓶內盛放嘅櫻花酒,同日本人賞花必吃的櫻花小丸子、櫻花布甸配抹茶雪糕,實在太吸引啦!Tea time 吃咁多正嘢,都唔係好過份唧!

Master Kama
地址:銅鑼灣謝斐道 500 號維安商業大廈 3 樓
電話:3421 2129
營業時間:12nn - 10pm

想睇更多?即上 銅鑼灣 特集!

歡迎你 like 我哋 U Food Facebook Page / U Food Instagram ,取得我哋更新更快嘅資訊!

↓【限時搶⚡】 Midea美的25公升氣炸焗爐!↓

↓ 結合「氣炸」同「烘焙」︱0.2秒即熱︱7種烹調模式↓


↓【必收藏】最新深圳食買玩攻略!↓

↓ 大灣區一小時生活圈!最新打卡熱點/熱門美食等!↓

more