店子原來是上海菜館金滿庭新開 young line，無論係店子的命名、裝潢同菜式設計都處處見心思。店名「喜遇」，既有希望大家食得開心、喜歡遇上的意思，同時又 tag 返這街前身是囍帖街個喜字。至於裝潢也向昔日致敬，加入了不少老香港元素，好似店內會見到大量舊物彷製品，如以前照雞蛋用的大紅吊燈、充滿鐵銹的鏡子、舊信箱等，好好 feel。
餐牌逾半都是傳統上海菜，由有入廚逾 20 年的李師傅坐鎮，用料講究，做素鵝的腐皮堅持自己做，排骨擔擔麵及咕嚕肉的豬肉又選用成本較高的新鮮貨。另外，店子仲推出了一人前的私房特餐，一百蚊有找的一人 set 已可試到兩款迷你版前菜、湯、主菜及甜品等，一洗傳統上海菜館大碟粗豪的形象，人少少都可以試到多款不同的菜式。除了上海菜，呢間咁靈活多變的店仲供應埋少量受香港人歡迎的亞洲菜。李師傅曾在全聚德工作，這裡也供應片皮鴨，不過師傅就特登做成一客兩件的小食分量，唔使成隻鴨咁叫；又好似唔少香港人都嗜辣，呢度亦可食到一系列的水煮菜式。
素鵝 $48
自家做的腐皮捲入已炒香的冬菇絲、甘筍絲及薑絲等，包好後再風乾 2 小時才炸，花工夫花時間，食落脆卜卜，口感豐富。
傳統烤鴨薄餅 $38
一客兩件， 烤鴨用 2-4 個月大的北京填鴨仔，香脆富油香，加埋大量京葱及海鮮醬，食落香而不膩。
蛋餅配鹹豆漿 $36 (早餐時段供應)
店子也設早市，其中一款早餐是台式的蛋餅配豆漿，蛋餅內的油炸鬼都是自家出品，加埋大量的炸菜、肉鬆、及雞蛋做餡，豐富飽肚。
排骨擔擔麵 $68
排骨用本地的新鮮豬扒輕醃及剁鬆再炸，香口鬆脆；擔擔麵的湯底用老雞熬的湯加豬肉碎、芝麻醬、辣椒醬等調成，微辣又充滿芝麻香，好惹味。
私房特餐 - 咕嚕肉 $88 (附飲品)
有齊兩個迷你版前菜、湯、菜飯、咕嚕肉、迷你版甜品及飲品，非常抵食！
花生沙冰 $28
用忌廉、沙冰粉、冰及大量花生醬打至幼滑再灑上已烤香的花生碎，沙冰充滿濃濃的花生香，口感極滑，不過都融得幾快，食時要同時間競賽！
喜遇
地址：灣仔皇后大道東 200 號利東街地下 G01,04, 05 及 F01A 號舖
電話：2388 3666
營業時間：試業期間 8:30am-11am (早市)，12nn-3pm (午市)，6pm-11pm (晚市)，稍後會開設下午茶時段
收費：現金及信用卡，設加一
交通：港鐵灣仔站 A3 出口
泊車：合和中心停車場 $20/hr
平均消費：$180
歡迎你 like 我哋 U Food Facebook Page / U Food Instagram ，取得我哋更新更快嘅資訊！
