BAND 炮製 分裂地窖型店

發佈: 2016.05.20
文:

迎面一幅幅熱情嘅火鸛壁畫,鏡頭向左 pan 先,係陽光味十足嘅簡約北歐 cafe,但視綫一轉,卻有 hardcore 嘅華麗大舞台,晚巿仲會變身 band 場,精神分裂,不過亂得嚟好型喎,我 buy。

幾個未接觸過飲食業嘅音樂青年,將舖頭結集另類音樂、藝術同業餘廚藝元素,卻又盲拳打出新血路,2 年多儲落有一班真心 fans,壯大了雄心,一於再搞大啲,於是就有呢間地窖型店出現。

地窖加埋有 2,000 多呎大,極啱搞地下騷,幾位 band 友一致鍾情就拍板簽約。阿周說這裏會做午巿,要照顧斯文白領,所以把舖頭一角設計成北歐 cafe;但另一邊廂,又忍唔住漏咗啲嘅狂野本性出嚟,搵咗啲本地 artist 畫啲 graffiti 裝飾,華麗而 raw 嘅大舞台也實在少不得,開業短短 3 星期,就已搞過幾場 indie band 騷,像外國同 youtube 好紅嘅國際勁旅 Crad Valley 及 Black Bird Black Bird,仲有土炮樂隊新青年理髮廳,勁有 east London 神秘地下音樂廳 feel。

No good food 都係 no life 㗎,這裏食物一啲都唔另類、唔分裂,主打唔花巧既又樸素的手工意粉,廚師每天在廚房以日本麵粉做 fettuccine,recipe 反覆試過多次,才有而家鮮香、柔軟好"口趙" 嘅效果,加埋自製的 pesto、忌廉汁同番茄醬,簡單美味。小食都亮點處處,最正係炸雞,雞鎚是無激素的,雞味勁鮮,另外,肥爆而邪惡的花生醬奶昔、升級嘅忌廉溝鮮奶都正,周末仲有 brunch,早午晚都幾啱蒲咁喎!

招牌海膽意粉 $138
忌廉汁是廚師 homemade 的,上面有分量不少的海膽,將海膽撈勻,闊條麵又滑又掛汁。

烤釀大野菇 $98
3 款分別釀入肉醬、香草醬,及車打、巴馬臣及菲達三色芝士的 Portabello 大磨菇,即叫即焗,一上枱便香氣逼人。

羅勒醬雞肉意粉 $108
香草醬是廚師以羅勒、巴馬臣芝士做,跟足傳統加了烘過的松子,雞肉以清酒及豉油等醃過,意粉鮮香,仲有清新的 basil 香。

C.S.M $65
忌廉溝鮮奶的變奏版,除了傳統的忌廉汽水,仲加了煉奶及燒過的棉花糖,飲時加入凍奶,香甜又滑。

Peanut butter monster $58
底層是呍呢嗱雪糕加花生醬,上面有用壓縮瓶打成、澎湃又挺身的忌廉,奶昔稠身但好滑,仲喝到粒粒花生碎,甜中帶少少鹹。

Café Hillywood

地址:尖沙咀柯士甸道 152 號地庫(可穿過柯士甸小路好兆年行 lobby 到達)
電話:2762 1727
營業時間:11am-11pm
收費:暫時只收現金,6 pm 後設加一
交通:港鐵佐敦站 D 出口,步行 7 分鐘
泊車:好兆年行 $33 hr
平均消費:午巿 $55-$98、晚巿 $150

相關報導:
不是文青 唐樓花廳
爆粗地正 鬼佬涼茶舖
上環唐樓 不時不吃小餐室
MK 不再 嘴刁實驗室
海邊咖啡即興 PICNIC
冬菇亭 型格甜品大懶床

想睇更多?即上 尖沙咀 特集!

歡迎你 like 我哋 U Food Facebook Page / U Food Instagram ,取得我哋更新更快嘅資訊!

↓【免費送🎁】Patisserie Tony Wong全新花形系列蛋糕!↓

↓立即拎走3款口味:芒果椰子+朱古力紅桑莓+柚子芝麻!↓


↓【限時搶⚡】Louiscocoa鳳梨啤酒口味可可即沖營養代餐奶昔!↓

↓ 首創含微量酒精代餐 / 嚴選高級可可粉 / 加水即沖即飲!↓

more