小儀：尖咀食出北歐味

我仲食到同兩個老闆 Bong 和 Jason 變咗 friend 底。呢兩個男仔，總係諗頭多多，淨係甜品滿足唔到佢哋，今次佢哋唔賣甜品，改賣北區......唔係，係北歐料理先啱，梗係要嚟「拾卜」下。

北區......唔係，係北歐嗰朕味，真係入到嚟就 feel 到啦。舖頭用咗泥水牆做主調，黑掹掹咁，天花又掛咗好多枯枝，仲有雲石餐枱，簡約加型仔，我真係以為自己去咗哥本哈根喎。

ATUM Desserant 個邊係玩席前 tailor-made 甜品，不過尖沙咀店就放棄咗呢種模式，不過一樣有 open kitchen，全場每張餐枱的食客仍然可能八卦廚師喺度搞邊科嘅你食。Bong 同 Jason 煮食上走得好前，佢哋將而家大熱嘅新北歐食桌引入香港。新北歐料理即係乜？係用返本地食材 + 反叛嘅煮法 + 簡約時尚嘅 presentation。

呢度有好多搞鬼嘢，檸檬薏米大家都食過啦，平時阿媽都會煲嚟袪下濕、美下白，不過落起 Bong 同 Jason 手上，佢用咗嚟配五花腩；持蟹賞菊，意境係咪好優美呢？兩位男士將呢個意境變咗做蟹肉沙律拌柚子菊花，雖然話呢度 sell 北歐，但我估呢啲嘢北歐無啩。

我要推介今次我吃嘅八•爪•魚，望落好似好簡單，全碟都係亮點呀，因為個八爪魚慢煮後好鬼腍滑，用墨西哥辣椒油炒，入口有少少噴火 feel，真係辣架，唔好忽個「米型粉」，雖然佢係米樣，但真係 pasta 嚟，超滑超吸汁，將佢放起墨汁脆片上食，惹味惹味。

人做海鮮，佢又做海鮮，盤 signature 都特別過人，你以為純粹擺得靚？咁就錯晒啦，有好多分子料理位你要放入口先領略到，海鮮上面香檳啫喱同果味爆珠嚟為海鮮調味，加拿大海膽、象蛂蚌、日本帶子刺身、蟶子、蟹肉、鵝肝凍批同法國生蠔夾埋原來好似畫咁靚喎，即刻清碟先。

甜品呢我揀咗粟米，兩位大廚將刨咗啲粟米嚟做雪糕，食落有少少似 creamy 北海道粟米湯，原來幾啱做甜品喎。

ATUM Restaurant
地址：尖沙咀河內道 18 號 K11 一樓 101 號 B 舖
電話：3586 1959

想睇更多？即上 尖沙咀 特集！

歡迎你 like 我哋 U Food Facebook Page / U Food Instagram ，取得我哋更新更快嘅資訊！