小儀:立食分子料理

發佈: 2016.05.31
文:

呢間分子料理 bar,玩「立食」概念,反傳統,掉咗慣常嘅 fine dining 嘅上菜法,由廚師喺你面前加氮氣、玩煙燻,再好似 serve 啤酒咁,直接由佢遞餸畀你,咁零距離嘅立食分子料理,係老闆加主廚 Arthur(圖右)諗出嚟嘅,佢仲專登用 lab 嘅白光鎢絲燈,營造神經博士實驗室嘅效果,佢話要襯返分子料理嘅 style 喎。想立食,呢度一晚有 3 個時段揀,每段 1 小時或 1.5 小時,一次可容納大約 10-12 人。咦咦!地方細細,好啱包場喎,約埋班 friend 包起個場開分子 party 都好喎。

阿媽教落人不可貌相,呢個道理用喺分子菜式都得。純情的我,上第一道菜已被人欺騙咗感情啦,個車厘茄一上枱,心諗呢杯嘢邊忽似分子嘢先?放入口,先知啲車厘子超蠱惑,咬爆佢會爆出好似汽水咁嘅泡泡,原來 Arthur 打咗啲 C02 入去,好衰囉,呃人!

我唔會再中計啦,匙羮上嘅「蛋黃」,我食過,肯定芒果扮嘅。點知連蛋黃呃我,係哈密瓜味嘅,大廚奸笑問我睇唔睇到上面塊 45 個月黑毛豬 ham?學《The X-files》話齋:the truth is out there,配火腿最 classic 嘅配搭,咪就係 melon 囉,激死人,點解會諗唔到㗎?

伴隨住奸笑,Arthur 攞咗個鐡兜嚟放 Nitrogen,然後遞咗碟「冰球」畀我?吓!我死命咁左瞄右昅,唔畀佢出蠱惑。放入口係冰球係忌廉味,裏面係三文魚,我呢一刻覺得自已係吃三文魚嘅 Elsa。

大菜要嚟啦,玻璃樽裏面係食落滑到好似 mousse 嘅 62℃ 慢煮嘅法國雞胸同牛肝菌脆脆,一打開,煙霧瀰漫,好香 rosemary 同木味,原來陣煙係燒着嘅橡木同迷迭香;最開心,係連煲飯都有得食,成個煲仔入爐焗,超級熱辣辣,再淋上打成泡泡嘅鮑汁,香氣逼死人咩?食到底仲有飯焦添,嘴舔舔呀。

呢個時候,大家係咪最想問全部細細碟咁,食唔食得飽?燈燈燈櫈......作為當之無愧嘅 David 妹(大胃妹呀......)我好有信心咁答你哋,係飽嘅。1.5 小時慢慢食,唔趕好 alright,聽聞企都可以消耗卡路里,咦!咁我咪可以去隔籬舖,食埋個甜品囉。

Three Dice Kitchen

地址:銅鑼灣禮頓道 136 號希雲閣地下 2 號舖
電話:9811 1880
營業時間:2pm-10pm
收費:6pm-7pm $170 位、7pm-8:30pm $230 位、8:30pm-10pm $230 位
備註:6pm 前供應乳酪甜品

想睇更多?即上 銅鑼灣 特集!

歡迎你 like 我哋 U Food Facebook Page / U Food Instagram ,取得我哋更新更快嘅資訊!

↓【免費送🎁】Patisserie Tony Wong全新花形系列蛋糕!↓

↓立即拎走3款口味:芒果椰子+朱古力紅桑莓+柚子芝麻!↓


↓【限時搶⚡】Louiscocoa鳳梨啤酒口味可可即沖營養代餐奶昔!↓

↓ 首創含微量酒精代餐 / 嚴選高級可可粉 / 加水即沖即飲!↓

more