米芝蓮 新派日本餐廳登陸

發佈: 2016.05.27
文:

店子叫 La Bombance,法文是「enjoy the meal」的意思,主打糅合法國料理等西方元素的日本菜,2004 年已於東京西麻布開業,更連續 8 年獲得米芝蓮星級榮譽,連日本名人中田英壽都是其粉絲。

香港店是 La Bombance 的第一間海外分店,只開晚市,目前獨沽只賣一款 9 道菜套餐,菜式均由總店的日籍總廚岡元信設計,並都是曾在總店推出的款式。菜式之所以走新派路綫,與岡元信的工作背景有關,他曾在當地多間知名的餐廳如福田屋日本料亭及法式鐵板燒餐廳等地工作,故在設計菜式時也不忘探索將西方食材融入菜式的可能性,好似燒飯糰,他配上鵝肝、宮崎芒果用巴馬火腿包着,釜飯又配以意大利黑松露等。來到香港,又入鄉隨俗以本地的新鮮花竹蝦及鱔等入饌,食落零違和感之餘仲多了份驚喜。套餐中亦見傳統日本菜的菜式,水準亦高,皆因用料講究,刺身及魚鮮多由東京築地入口,和牛選用 A4 級、做壽司及食事的米又只用新潟入口的,自家煮的醬汁除了常用的木魚片又會加入吞拿魚節令味道更醇厚,連煮食的水都只用日本礦泉水,每樣細節都一絲不苟,加上賣相超精緻,又用上不少日本直送的手繪漆器及矜貴餐具,計落每道菜才百幾蚊,卻都是心思之作,性價比非常高。加上菜式會每月轉換,保證驚喜不斷。

北海道松葉蟹、軟煮鮑魚、炭燒賀茂茄子、甜番茄及生薑果凍醋
松葉蟹鮮甜、鮑魚先蒸後用其汁加昆布煮過,腍滑好吃,點睛處是加了自家用土佐醋及薑做成的啫喱,開胃提鮮。

照燒鵝肝迷你燒飯糰、巴馬火腿裹宮崎芒果、鮮腐皮佐酥炸小白魚、酥炸琵琶湖小鮎魚、酸汁伴三葉莖及木之芽
賣相很精緻,飯團用糯米代替白米,更香更富嚼勁;巴馬火腿鹹香,與芒果的香甜很夾;腐皮滑溜帶豆香,炸小白魚及小鮎魚香脆。

蓮藕薄片、車海老、蜆、帆立貝真丈、佐海苔高湯
以手繪漆器盛載,海苔高湯帶淡淡鮮香,魚丸由本地花竹蝦、北海道蜆肉及帆立貝等加魚漿打成,鮮甜彈牙。

醬油漬吞拿魚腩壽司、北海道海膽壽司、炭火燒鱧魚、火炙金目鯛、牛蒡醬油漬
做壽司的刺身均由築地直送,米粒則用新潟米,上桌時還付以自家製醬油及小掃子讓客人自行調味。

和牛壽喜燒佐大葉胡麻豆腐
A4 的佐賀或鹿兒島和牛捲着日本芹菜再配以自家調的壽喜燒醬汁,香甜柔軟;上面還襯上一件包了大葉去炸的自家製芝麻豆腐,豆香十足,香滑不膩。

鮮莓提拉米蘇、黑芝麻雪葩
Tiramisu 幼滑帶淡淡芝士香,配新鮮雜莓汁吃特別香甜,黑芝麻雪葩芝麻味非常濃郁,也可加進 tiramisu 同吃提升層次。

La Bombance

地址:銅鑼灣登龍街 18 號 V-Point 30 樓
電話:3188 3326
營業時間:6pm-9:30pm (最後點菜時間)
收費:現金及信用卡,設加一
交通:港鐵銅鑼灣站 A 出口
泊車:時代廣場 $26/hr
備註:目前只供應 9 道菜套餐,每位 $1,280,須預訂。

想睇更多?即上 新餐廳 / 銅鑼灣 特集!

歡迎你 like 我哋 U Food Facebook Page / U Food Instagram ,取得我哋更新更快嘅資訊!

↓【限時搶⚡】 Midea美的25公升氣炸焗爐!↓

↓ 結合「氣炸」同「烘焙」︱0.2秒即熱︱7種烹調模式↓


↓【限時搶⚡】Louiscocoa鳳梨啤酒口味可可即沖營養代餐奶昔!↓

↓ 首創含微量酒精代餐 / 嚴選高級可可粉 / 加水即沖即飲!↓

more