小巷 創意心機車仔麵

發佈: 2016.06.01
文:

原來這是間車仔麵店,老闆之一 Nichola 解釋用麻將做裝飾,是因為覺得車仔麵就好似麻將這國粹咁靈活多變,同埋做車仔麵就好似造牌咁,肯花點心機,總會食出。

裝潢、概念咁有趣,食物都果然有驚喜。先講湯底同汁底,就有一般車仔麵店少見的馬來喇沙、秘製麻辣湯底等選擇。前者用的是其中一位 partner 媽媽的食譜,她是馬來西亞華僑,用的花生膏、沙嗲醬等香料全都自當地入口,香得有層次;麻辣湯底則由多款自四川入口的辣椒醬油調成,仲講究地分埋大中小辣,麻辣勁足,嗜辣的人都覺辣得過癮。

至於餸料也一樣出人意表,近 40 款的選擇中竟可見到日系配料如溏心蛋、日式叉燒等,又不乏手工菜如蝦膠釀油炸鬼、慢煮牛舌、自家製魚肉燒賣等選擇,難得做得有水準,不流於只是不倫不類的 gimmick 層面。原來 Nichola 的叔叔曾做在香港及日本當過酒店總廚,今次開店也有向他取經。至於大路的豬皮、蘿蔔、魚蛋、牛腩、豬紅等都做得有水準,好似牛腩,就用自家調的滷水滷完再浸再滷第二次至入味軟腍、豬紅又要自己再用秘製醬油煮過令它入味不易散,處處落足心機。最抵死的是,餐牌上的菜式都貫徹麻將的元素,好似滷水雞髀麵叫一索麵、三餸麵叫混一色、指定的八麵餸叫「大三元」等,好意頭得來仲令人心思思想打返幾圈!

大三元 (指定 8 款餸) $88
日式叉燒:先將原件豬腩肉用上湯煮過,再用日式醬油浸過夜,奉客前才切片,肥瘦分明,腍得來入味。
滷水牛腩:用花椒、八角、甘草等多款香料調成的滷水汁先煮 2 小時再熄火焗再煮 2 小時,工序多,食落腍得一咬即化,非常入味。
自製魚肉燒賣:SIZE 比一般燒賣大,用九棍魚或其他當日鮮魚打成,九成以上都是魚肉,有魚味兼唔會食到成口粉。
豬紅:選用新鮮貨,自家再用蒜蓉沙嗲汁煮過,入味得來口感更 firm。
豬皮:用豉油汁及麻辣油煮過,索滿濃濃醬汁,夠哂重口味。
蘿蔔:在熬豬骨雞腳湯底時同時放進去煮,清甜無渣又帶豬及雞的鮮香。
炸魚片頭:自相熟的店鋪取貨,魚味香而不腥,彈牙有咬口。
咖喱魚蛋:自家用多種香料調成的咖喱汁,香辣刺激,魚蛋細細粒卻有魚味。
撈麵:拌入的滷水汁由近廿款香料慢煮而成,濃稠得來帶討好的甜味,配粗麵就最掛汁。

一索麵 (送汽水) $40
即滷水雞髀加時菜,雞髀用自家調滷水汁煮好,再浸一晚至入味,肉質腍滑入味。今次選了麻辣湯底配幼麵,麻辣醬由多款四川入口的醬油調成,可選大中小辣,辣勁十足。

混一色 (自選 3 餸) $39、 (馬拉喇沙湯底另加 $2)
喇沙湯底自家由馬來西亞入口的花生膏、沙嗲汁、椰奶等煮成,濃滑微辣,識揀梗係揀可索湯的配料,好似係釀入自家打蝦膠的油炸鬼、將新鮮豆腐放入冰格雪足兩日的冰豆腐,吸飽惹味湯底,好味!

爆辣牛丸 (車仔餸料) $7/2 粒
由相熟的製丸工場新鮮製作,彈牙的牛丸內釀有加了麻辣醬的墨魚微粒,爆汁惹味。

慢煮牛舌粒 (車仔餸料) $7/6 粒
用自家調滷水細火煮足 4 個鐘,食落非常軟腍,7 蚊有 6 粒,好抵!

四方城
地址:鰂魚涌英皇道881號麗華樓地下
電話:3106 0708
營業時間:7:30am-9pm
收費:只收現金,不設加一
交通:港鐵鰂魚涌站 C 出口
泊車:海光苑 $18/hr
平均消費:$50

相關報導:
高檔快餐!皇帝蟹龍蝦虎蝦三文治
一斤魚熬三碗湯!足料鯛魚湯專門店

歡迎你 like 我哋 U Food Facebook Page / U Food Instagram ,取得我哋更新更快嘅資訊!

↓【免費送🎁】Patisserie Tony Wong全新花形系列蛋糕!↓

↓立即拎走3款口味:芒果椰子+朱古力紅桑莓+柚子芝麻!↓


↓【必收藏】最新深圳食買玩攻略!↓

↓ 大灣區一小時生活圈!最新打卡熱點/熱門美食等!↓

more