Froyo 再彈起！

最Hit食訊

發佈: 2016.06.13

文:

配搭過癮好玩 Cozy Yogurt
土瓜灣係創意小店試驗場，喺區內捐窿捐罅，隨時有新發現。喺北帝街較靜嘅一段，竟然有家小清新 Froyo 店，叫 Cozy Yogurt。地方小小，兩旁有窄窄嘅吧枱，放幾張高腳椅子，放學時間最旺場！

黑板同玻璃櫃 show 晒 8 款指定乳酪雪糕款式，驟眼睇風格有啲似 Smile 嘅雪糕，每杯都有主題、有心思、有造型。講最人氣 item，非 Candy Land 莫屬，大大枝士多啤梨雪條倒插喺杯內，有啲似韓風甜品。

得意配搭，統統都係年輕老闆娘阿 B 構思出嚟，佢曾喺乳酪雪糕店工作，自己又愛吃雪糕，開舖創業，即想到做返老本行。因為係行內人，對雪糕味道尤其執着，獨沽一味賣原味乳酪，認為其他味道會遮蓋乳酸味。選澳洲脫脂奶加新鮮乳酸同乳酸粉做雪糕，奶味適中不算濃，勝在低脂，酸甜度適中，感覺健康。

反而 toppings 花款驚人，生果、脆脆、QQ、醬汁加埋超過 30 款！不少像 mochi、丸子等都係自製，最巧手係菠蘿同青蘋果，以糖煮過再燒，帶焦糖甜香脆；士多啤梨雪條以果蓉加牛奶製成；楊枝甘露醬用芒果打汁，加西米、柚子肉和椰奶調製，製作認真。呢樣加啲，嗰樣加啲，當年玩自選 Froyo 既返晒嚟！

Cozy Yogurt
地址：土瓜灣北帝街 105 號地下 A 舖
電話：2153 3278
營業時間：12:30pm-10pm
收費：只收現金，不設加一
交通：旺角先達廣場小巴直達
泊車：傲雲峰 $16/hr
平均消費：$50

優雅果味乳酪 Pain Perdu
旺角嘅雪糕店，會係點？地方逼狹？粗製濫造？開業一個月嘅 Pain Perdu 完全打破呢個印象，位於豉油街同染布房街交界，旺中帶靜；加上手繪花紋落地玻璃窗、小盆栽、花磚等點綴，帶幾分法式優雅。

話 Pain Perdu 係乳酪雪糕店唔太正確，佢其實係一間法式多士專門店。不過店內嘅乳酪雪糕實在太太太出色，好多人食多士之餘，會叫多杯乳酪軟雪糕！

每日有兩款口味，可單點也可以做扭紋，主要係果味，而家就有士多啤梨、芒果、紅莓，較特別嘅有熱情果、血橙同椰子。主理人之一係喺西貢開法國餐廳 Le Copains 嘅法國藍帶女廚 Bonnie So，貫徹用靚料唔使本嘅個性，雪糕以北海道 3.6 牛奶、澳洲乳酪粉製成，奶味香濃，乳酪酸甜度適中，唔會遮住果味。水果更揼本，用果肉達 90% 的法國果蓉，間中還會加少許新鮮進口水果做雪糕，因為無加色素，雪糕顏色偏淺，但果味超級鮮活，簡單配以牛油蜜糖炒香嘅法包粒粒，已經夠滋味。老闆們愈做愈起勁，更不斷加添新口味！

乳酪雪糕除咗淨食，仲可以配奄列蛋糕，以蛋糕夾着，似雪糕三文治！配上雜莓，賣相靚到爆，女生見到一定尖叫。

Pain Perdu Salon de The
地址：旺角豉油街 126 號地下 K 舖
電話：9309 9612
營業時間：星期日至四 11:30am-12mn，星期五及六 11:30am-1am
收費：只收現金，不設加一
交通：港鐵旺角東站 B 出口
泊車：廣發商業中心 $28/hr
平均消費：$60
註：西多士套餐可配法國茶、Soda、咖啡或多一杯雪糕。