小儀:抗熱會安小食檔

發佈: 2016.06.21
文:

而家我導遊小儀就帶大家走轉越南,各位團友跟實我,失散咗你無好嘢食,唔好喊呀。

導遊而家同大家玩遊戲呀,越南城巿大家識幾多?胡志明巿、河內、蜆港、下龍灣?咁大家有無聽過會安?實不相瞞,呢個離蜆港 1 小時車嘅城巿,我都未去過,不過兩位餐廳老闆 Keith 同 Tim 就有讚無彈,話呢個舊城無胡志明同河內咁 commercial,啲 street food 又土炮又好味,尤其係地道嘅手撕雞越式三文治,平靚正,食到返咗香港都掛住,於是就索性喺香港複製一個會安小食攤,當然係有冰涼冷氣版本啦,涼風送法包,爽歪歪呀。

我呢,覺得渡船角添記法包真係唔錯,本來以為呢度都一様,但個 style 又真係好唔同喎,實不相瞞,Tim 其實係 Shake'em Buns 老闆,佢最奄尖,佢話唔係搵條 baguette 返嚟就算,越南包搵麵包廠做,跟會安傳統,加咗「米粉」(rice flour)做嘅,成個電話咁肥嘟嘟嘅包包加咗米粉,呢個皮又脆又輕又唔刮口,暴食都唔怕刮爆上顎,而且筋度都高埋,好好咬又唔會實得得。

連配料都好精品㗎,可以揀佢哋自己用湯浸嘅手撕雞、西班牙 Iberico 火腿同肋條,(隻黑毛豬真係食橡果大),要清有清,要鹹香有鹹香,幾鬼細心。加埋火雞肝醬、洋葱、越南九層塔、芫茜、扎肉、自家醃甘筍、魚露同 homemade 嘅 creamy 蛋黃醬,個法包惹味又唔乾柴,好 light。

同場加映,個黃油雞飯都好鬼正,啱晒我呢啲懶咬嘢嘅懶人,手撕雞手撕鴨雙劍合壁,用油紙包住上枱,係就係麻甩啲,但真係好有油香,天口幾熱都趕唔走我嘅暴食熱情喎。

Cóm Bánh Mì by Chef Phuc Dat Bich
地址:灣仔大王東街 28 號地下
電話: 2528 9131
營業時間:12nn - 10pm

想睇更多?即上 灣仔 特集!

歡迎你 like 我哋 U Food Facebook Page / U Food Instagram ,取得我哋更新更快嘅資訊!

↓【限時搶⚡】Kilo Calo慢煮即食雞胸套裝!↓

↓ 雞胸經低溫慢煮烹調!/ 提供研製多時的獨特口味!↓


↓【必收藏】最新深圳食買玩攻略!↓

↓ 大灣區一小時生活圈!最新打卡熱點/熱門美食等!↓

more