重口味 綠茶芝士拉絲

發佈: 2016.06.25
文:

呢間新開嘅雞蛋仔店唔怕悶,一樣賣抹茶雞蛋仔,不過日日賣斷咁濟,大賣嘅秘密係加多樣港女死穴──拉絲芝士,芝士抹茶雞蛋仔撈亂晒,港女唔愛至怪啦。

雞蛋仔係潛力王,仲會好似以前咁污糟邋遢,未食已經嚇親,這間新開的雞蛋仔店,裝修十足十 cafe 咁寬敞雅緻,仲細心咁放咗 2 張 high table,邊吃邊 selfie 係零難度嘅。咁新派雅緻嘅雞蛋仔,老闆居然係兩個麻甩仔──石生與陳師傅,舖頭開業個零月,已經試過未收工,600 底雞蛋仔完全售罄,簡直係元朗奇葩。

銷情快過光速嘅綠茶芝士奧利奧雞蛋仔係殺着,賣相靚唔靚,有眼睇唔多講,反而想講下隔住張雜誌紙,你哋感受唔到嘅綠茶甘味。兩位老闆係 die hard 級嘅雞蛋仔 fans,食勻全港綠茶雞蛋仔,唔係無茶味,就係係一朕砂糖香油味,所以自己開店就玩重口味,開業前試足 1 年,參透咗用台灣來嘅綠茶粉做,入口綠茶味超甘濃,甜味不重,食慣甜椰椰雞蛋仔嘅,可能會覺得苦苦哋,但識食嘅直頭讚似中村藤吉咁正。

老闆話要搣甩老套,唔好下下配紅豆,叫大家試下綠茶雞蛋仔配水牛芝士同手搣奧利奧,oreo 一塊搣成 4、5 小件加落雞蛋仔度,有咬口之餘,在甘濃嘅綠茶味中加甜,半融嘅芝士又帶少少鹹香,估你唔到鹹香同綠茶味又幾夾,又中和咗奧利奧嘅激甜。

老闆話無論乜味嘅雞蛋仔都落足料,麵粉比人落多 2、3 成,每一底雞蛋仔仲要落足一大隻泰國大蛋,不加發粉,烤好的雞蛋仔都幾墜手。有圖有真相啦,雞蛋仔裏飽飽滿滿,不像坊間般只有半滿,半底都食到飽肚,加埋撕開相當治愈嘅芝士拉絲,隔住個芒都令人腸胃「滾動」到肚餓了。

綠茶雞蛋仔 $20(芝士 $5、Oreo $3)
一烘好,已飄來綠茶味,趁熱搣開,我撕我搣我拉,拉出半融芝士絲,雞蛋仔食落外面脆,裏面像海綿蛋糕般煙韌,有蛋香及綠茶甘香,仲食到少少鹹香味;配 oreo 都不俗,oreo 唔係得啲粉,大大粒有咬口,其甜味令綠茶甘香更易接受。

原味 $18
每底平均用上一隻泰國大蛋,這款蛋味十足,口感像蛋糕,仲有吉士粉嘅香味。

咖啡 $20
咖啡味係記者最愛,蛋漿裏加入了自家沖泡的齋啡,而非得個甜字嘅即溶三合一咖啡粉,完全不甜,但有咖啡的甘醇,老闆話最啱加配朱古力粒,加點甜味。

朱古力 $20
這款很勁,老闆在蛋漿裏加了法國朱古力粉,可可味甚濃郁但又無苦味。


地址:元朗又新街 38 號恆富大廈地下 11C 號舖
電話:5502 0802
營業時間:1pm-10pm
收費:只收現金,不設加一
交通:西鐵元朗站 B 出口,步行 7 分鐘
泊車:交通廣場 $20/hr
平均消費:$20

相關報導:
愛麗斯夢遊……
本土派 雪糕雞蛋仔
來自星星的雞蛋仔
外貌協會加持 紫星雞蛋仔
胡椒大尉 太陽蛋的後裔
全球首創 獅子山味雞蛋仔送啤酒
鍵盤戰士 決戰暗黑窩夫
X-Waffle 咖喱吞食戰
好嘢!菠蘿‧哈蜜窩夫盅
當頭起!空氣感梳乎厘班戟

歡迎你 like 我哋 U Food Facebook Page / U Food Instagram ,取得我哋更新更快嘅資訊!

↓【限時搶⚡】 Midea美的25公升氣炸焗爐!↓

↓ 結合「氣炸」同「烘焙」︱0.2秒即熱︱7種烹調模式↓


↓【限時搶⚡】Louiscocoa鳳梨啤酒口味可可即沖營養代餐奶昔!↓

↓ 首創含微量酒精代餐 / 嚴選高級可可粉 / 加水即沖即飲!↓

more