貨櫃場開餐 大堆頭 Pan Cheese 炸雞

發佈: 2016.06.24
文:

如果有間餐廳,門面已布置成超開闊的 shocking pink 貨櫃,裡面頭頂竟有半架車在牆上「飛」出來,彷彿邀請你在工程中的工地開 party,呢個陣容又夠唔夠噱先?

這間浮誇韓國餐廳,由韓籍老闆韓先生所開,他在香港開韓國餐廳的經驗很豐富,包括咖啡韓食、與 partner 合開的「達人包車」,甚至這 container factory 的前身「達人烤肉」都由他開設。不過,韓先生覺得燒肉涉及的烹調過程不多,加上香港人都貪新鮮,所以索性關掉「達人烤肉」,再在原址轉更有趣的事。「香港嘅物流業在全球做到數一數二,我諗起香港的貨櫃碼頭,覺得用來做餐廳主題夠晒話題性,加上我發現原來韓國有間 MIES Container 都以貨櫃做主題,好型!更加 support 到我嘅想法。」

他不惜工本,將近 5,000 呎餐廳打做成「貨櫃場」,酒吧在貨櫃內、 牆上「飛車」、煤氣罐、一大堆安全帽同水管……單計裝潢,都用上成百萬,唔少食客來到都邊打卡邊睇到「嘩嘩」聲。

裝潢先聲奪人,好在菜式也絕不欺場,而且選擇超多,好似雞,就同時供應不同口味的炸雞同烤雞,前者即叫即炸,炸油最多用兩天便會換,後者用德國入口的烤爐半烤半蒸,keep 到肉質 juicy,炸雞/ 烤雞仲可配近期大熱的奶油麵包食,好豐富。另外,香港人愛芝士,必試店子的 pan cheese,就像一個只用半融芝士代替餅底的 pizza,連配料焗再用蒜蓉包沾來食,好肥仔卻超惹味。店子的菜式普遍都好大件頭,想試多啲款式記得拉大隊來食。

豬手拼盤 $520
將德國豬手用韓式麵豉醬煮 3 小時、輕輕焗過後再炸香,食落比德國style的豬手脆度略低,但更軟諗,入味 juicy。拼盤仲有沙律、炸薯條及炸雞翼,可以點一客幾個人 share。

奶油麵包炸雞 $190
水準甚高,炸雞足有一隻分量,微辣入味,非常脆口,有嚼勁的麵包內放入忌廉醬再鋪上水牛芝士焗,香濃 creamy,用來沾炸雞食味道多了份層次。

糖醋肉 $180
將豬頸肉沾粉炸香再配用韓國醋及醬油煮的汁,加埋菠蘿粒、燈籠椒等配料,無論賣相定味道都有點像中國人的咕嚕肉,不過醬汁較多,醬油香更濃。

擁抱芝士通粉的焗雞 $180
即將推出,原隻烤雞內釀入芝士通粉,有趣又飽肚,除了通粉,仲可選釀入意粉或雞蛋,下面仲有一圈炸薯絲扮雀巢。命名也有趣,原來靈感來自韓劇《擁抱太陽的月亮》!

烤肉芝士 PIZZA $180
厚厚的水牛芝士混入韓式煮牛肉、洋蔥粒及燈籠椒粒,用蒜蓉包蘸來吃,鹹香 cheesy,好邪惡!

芝士豬排骨 $300
豬排骨焗好澆上BBQ汁後原件放在銷滿芝士的鐵板上,超有份量,又一道晒食肉獸同芝士控的肥仔菜式。

Container Factory Restaurant & Bar

地址:尖沙咀柯士甸路 20 號地舖
電話:2317 1110
營業時間:12nn-4am

想睇更多?即上 新餐廳 特集!

歡迎你 like 我哋 U Food Facebook Page / U Food Instagram ,取得我哋更新更快嘅資訊!

↓【限時搶⚡】 Midea美的25公升氣炸焗爐!↓

↓ 結合「氣炸」同「烘焙」︱0.2秒即熱︱7種烹調模式↓


↓【出Post賺現金賞】《社群》助您發展創作者事業↓

↓透過發佈帖文賺取收入!立即參加!↓

more