平霸雞煲大戰

發佈: 2016.07.23
文:

最近於全港掀起雞煲減價戰,$88 無限時任食新鮮雞、$38 一個鐘任食,仲有平到尖叫 嘅 $1 雞煲!無論你係嗜雞之人還是長期糧尾的成員,見到雞煲個價位落得愈低,就愈興奮!

長沙灣 $88 任食新鮮雞煲
開講有話「高手在民間」!根據呢個邏輯,小記深信好嘢、筍嘢、正嘢必定隱身於平民之地。果然無估錯(或許我太聰明!),位於長沙灣街市內的「林洪記」,推出 $88(免加一)任食雞煲。單睇個價位絕對平唔過其他餐廳,但原來餐廳選用新鮮雞、無限時兼有 5 種口味任揀,又有粥底火鍋、指定配料任食。計番條數,真係幾抵食!

林洪記的任食雞煲,記得唔好自己一人獨食,因為任食的唯一條件是需要兩個人一齊食。雞煲有 5 款口味,包括麻辣、胡椒豬肚、醉雞、奇味及清湯,招牌的麻辣有大麻、小麻、大辣、小辣選擇!麻辣及奇味都是乾身無湯,食完雞件後可以加雞湯打邊爐。胡椒豬肚、醉雞及清湯則是有湯底浸着雞件,食醉雞鍋會畀埋枝酒你任加!

小記試食招牌麻辣雞煲,雞件用十多種香料醃過夜,收到柯打後才爆炒至 8 成熟至乾身、雞皮爆到脆脆哋,好惹味!新鮮雞肉的肉質嫩滑有彈性,一個雞煲至少有二十多件。食完一 round 又可以再添,老闆話試過有人加足 5 round,食到飽為止!

除咗雞件任添,仲有肥牛、豚肉、雞腸、雞紅、金菇、西洋菜、冬瓜片、粟米、豆腐、生根、牛丸、墨魚丸、公仔麵、烏冬等 35 款火鍋配料任食!你又可以加錢食其他自選火鍋配料及小食,全部由 $30 至 $68 不等,最貴的美國桶蠔則賣 $148。老闆透露,由 7 月起會將火鍋配料的選擇增至五十多款,仲會有汽水任飲。一個字:抵!


任食麻辣雞煲 $88
麻辣雞煲用椰菜墊底,雞煲乾身無湯,食完雞件後可以加雞湯打邊爐。


麻辣雞件即叫即炒,表面脆脆哋,件件都好有肉地。


任食新鮮雞粥底火鍋 $88
粥底好綿滑,店員會將雞件及粥底分開上,等客人自己慢慢加雞。


雞件及雞紅都係畀 $88 就可以任食!


肥牛、豚肉、魚片頭、西洋菜、公仔麵、鳥冬等 35 款火鍋配料都係任點任食!

林洪記
地址:長沙灣保安道 325 號保安道街市 3 樓 CFS4 號檔
電話:5171 0142
營業時間:6pm-3am

觀塘 1 小時 $38 任添雞件
嫌長沙灣街市唔方便,坐街市熟食檔唔夠舒服?觀塘都有跳樓價任食雞煲!位於觀塘嘅「香港風情」,係港鐵站附近 5 分鐘路程就到!$38 任食雞煲講到明是兩位起,由於已經於網上瘋傳,所以頭輪晚上 6、7 點已大排長龍,小記唔想天時暑熱等位等到成身汗,於是選擇晚上 9 點半到訪,果然是唔使排隊(又是我太聰明!)。

入到餐廳,見到有 9 成食客都食緊雞煲,個個都好似跟時間競賽咁低頭密密食,搞到我都進入戰鬥狀態!店員首先會問要辣還是不辣,等咗 10 分鐘終於上雞煲喇!雞煲有大量湯浸住,撈一撈睇睇,都幾足料!一煲至少 30 件雞,雞胸、雞背、脾位、雞翼乜都齊,仲有少許洋葱、雞髀菇片。

雞煲辣味唔夠,又無麻的感覺,唔食辣的朋友都可以揀辣味。雞件唔太入味,但好在食唔到有雪藏味,肉質又唔會好嚡好乾。小記與朋友一行二人,花咗差不多半個鐘先食完第一 round。完成任務即刻舉手加雞,店員幾分鐘內就幫忙加雞件,粗略估計都有接近 30 件雞。

淨係食雞好 dry?可以加錢點其他火鍋配料,不過價錢一啲都唔親民。丸類由 $42-$78 不等、金菇 $32、讚岐烏冬(兩個) $48,窮 L 如我都是任食雞加個白飯($12/ 碗)算數。順帶一提,如果一個鐘過後仲未夠喉,可以再畀多 $38 加鐘一小時。抵唔抵食,要睇你食量有幾大、食得有幾快喇!


任食雞煲 $38
第一 Round 都有三十多件雞,算足料。


雞胸、雞背、脾位、雞翼乜都有;仲有幾片雞脾菇,吸晒啲湯汁,好惹味!


湯底愈滾愈濃,味道愈來愈鹹,建議加水稀釋吓好過加湯。


列明晒任食的條件,超過一個鐘會自動加鐘,大家記得睇時間。


場內幾乎人人食雞煲,但抽氣設備一般,食完成身都係雞煲味。

香港風情

地址:觀塘興業街 1 號駱駝漆中心地下 B 號舖
電話:2345 1399
$38 雞煲任食時段:星期一至日 6pm後(加 $38 延長 60 分鐘)

元朗 平絕 $1 雞煲
雞煲近年不僅愈來愈 hit ,仲愈嚟愈平!最近元朗就有火鍋店推出 $1 雞煲,除咗另收加一及 $8 醬油錢之外,無其他隱藏收費,齋食 $1 雞煲走人亦無任歡迎,唔怕坐低畀人劏到銀包出血。

元朗的「巴打火鍋館」原本唔係以雞煲做主打,不過見近排雞煲勁 hit,又想益街坊,所以大搞 $1 雞煲優惠。每晚 9:30 入座,就可以用 $1 食到川味麻辣雞煲,2 至 4 人會有半隻雞,5 個人以上就有一隻雞。雞件首先會經生煎處理,封住肉汁;煎到 5 成熟後,再用以花椒、辣椒粉、辣椒乾等煮成嘅秘製麻辣醬炒香,爆炒至 7 成熟,再加紫洋葱、青椒等就可以上枱。

香噴噴!雞件分量唔少,雞胸、雞背、雞翼、雞髀樣樣齊,無抽起好肉嘅部位。雞件炒得比較乾身,開火撈起雞件聞到好香麻辣醬味。雞煲可以揀大、中、小辣,小記試嘅小辣,微辣帶點麻,好惹味。未夠飽,當然可以畀錢追加啦,不過就要計原價,$148/半隻及 $238/ 隻。又或者柯打其他火鍋料,繼續打邊爐。但如果你真係長期糧尾,淨食 $1 雞煲加個 $8 白飯,老闆話佢都唔介意喎!


雞煲 $1
2 至 4 人會有半隻雞,5 個人以上就有一隻雞。另可選胡椒豬肚雞鍋或藥膳花雕雞鍋。


脆鯇魚皮肉 $68
即係連肉嘅魚皮,大廚每日即起魚皮肉,每條魚只能起出 6 碟分量。放湯滾 1 分鐘食得,魚皮爽彈。


本地新鮮鵝腎 $58
鵝腎每日返貨,爽口彈牙!


黑蒜手打豬肉丸 $68、$38/ 半份
用豬後腿肉手打而成,拌入黑蒜粒再搓成丸,蒜味入口就嚟料!


左:Brother 沙冰 $38、右:青檸梳打、檸檬柚子梳打 $28

巴打火鍋館

地址:元朗鳳攸東街 9 號好順意大廈地下 33 號舖
電話:2217 8862
營業時間:5pm-12:30am

文:Jessie、攝:Kee、Paul、Jessie

歡迎你 like 我哋 U Food Facebook Page / U Food Instagram ,取得我哋更新更快嘅資訊!

↓【免費送🎁】Patisserie Tony Wong全新花形系列蛋糕!↓

↓立即拎走3款口味:芒果椰子+朱古力紅桑莓+柚子芝麻!↓


↓【必收藏】最新深圳食買玩攻略!↓

↓ 大灣區一小時生活圈!最新打卡熱點/熱門美食等!↓

more