親試!任食自助 BBQ   4 大亮點!

發佈: 2016.07.14
文:

亮點一:服務貼心
一入座,就入幾款頭盤送上嚟,以及最受歡迎嘅大路串燒款式,呢個抵讚,因為可大大縮短入紙嘅等候時間!自助燒烤,可以按自己喜好揀選心水材料,仲可以控制燒烤嘅生熟程度。但唔識燒點算?唔緊要!因為有侍應在場指導,仲會話你知邊款食品同邊款醬汁最夾,態度仲好好㖭!自己燒到攰,佢哋又樂意接班多燒幾 round,唔怕回唔到本!除咗配料源源供應源源不斷咁燒,餐廳亦設任飲汽水、芒果汁、自製雪梨茶同啤酒,選擇都算多!





亮點二:自製薯片
食物選擇更多,有超過 50 多款串燒任揀,有豬牛羊雞有海鮮有蔬菜有丸,最特別嘅莫過於可自製薯片!將一塊塊切好嘅生薯片放喺爐上烘至收乾水分,直至乾透,就成為香脆可口嘅薯片。聽落簡單,但控制火候都幾難,小編都要整第 2 round 先成功,薯片要不斷翻轉避免烘燶,但薯味好重,幾好食喎!

亮點三:漢堡拆散再還原
第二必試 item 係大蘑菇,餐廳已預先以錫紙包好,並加入煙肉及醬汁,只需將蘑菇放上爐燒約 5-6 分鐘即可。燒完後一開錫紙,濃郁嘅菇香撲鼻,而且盡吸醬汁,好惹味。手打迷你漢堡串仲過癮,將剛上枱嘅原個 burger 拆件放上爐,麵包輕烘約 1 分鐘,外脆內軟;帶有醬汁嘅漢堡扒則燒 3-4 分鐘,將 burger 砌回原狀,新鮮熱辣!我當日仲食咗煙肉荔枝、海膽蜆肉、芝士牛油金菇、雞皮等,配搭都算嶄新。另加 $98 更可任食扇貝、鰻魚等海鮮。

亮點四:醬汁款式花碌碌
除咗美食多選擇,連配燒烤的醬汁都令人揀到頭痕,有成 11 款咁多:秘製辣醬、麻油鹽汁、沙嗲醬、檸檬蜜糖汁、日本燒汁、蜜糖黑椒汁、美國 BBQ 汁、新加坡醬、豆瓣醬、韓國辣醬及蒜蓉,枱面另有海鹽、胡椒粉供應。除咗蒜蓉、辣醬、燒汁幾款常見醬汁外,小編推介檸檬蜜糖汁,酸酸甜甜,能令食物提味,味道更為豐富。


(左起) 辣醬、麻油鹽汁、沙嗲醬、檸檬蜜糖汁、日本燒汁、蜜糖黑椒汁、美國 BBQ 汁、新加坡醬、豆瓣醬、韓國辣醬、蒜蓉!

同人燒
地址:尖沙咀山林道29-31廣利樓1樓及地下4號鋪
電話:2392 8433 (Whatsapp 訂座:6719 7273)
營業時間:5:30pm-12:30am
交通:港鐵佐敦站 D 出口,步行約 5 分鐘
收費:暫只收現金,設加一
價錢:

成人 小童
7:30 前離座 $218 $158
7:30 後離座 $238 $178
9:30 後入座 $218 $158

註:星期五、六、日、公眾假期及前夕另加 $10;另設加一

文:Joyce、攝:Louise

歡迎你 like 我哋 U Food Facebook Page / U Food Instagram ,取得我哋更新更快嘅資訊!

↓【限時搶⚡】Kilo Calo慢煮即食雞胸套裝!↓

↓ 雞胸經低溫慢煮烹調!/ 提供研製多時的獨特口味!↓


↓【必收藏】最新深圳食買玩攻略!↓

↓ 大灣區一小時生活圈!最新打卡熱點/熱門美食等!↓

more