熟食中心位於觀塘碼頭，是七八十年代政府為工廠區興建的，樓高兩層，內裏盡是茶記，地方狹小、地踎，隨住周圍食肆商場漸多，更顯破落。「拿督」屈在一樓走廊盡處，可說是死位中的死位。估唔到環境卻最光鮮、企理、舒服！有冷氣、有掛畫裝飾、部分座位仲有得挨，同熟食中心是兩個世界！
熟食中心地方破舊，窄窄的巷子兩旁，盡是茶餐廳。
舖內光猛兼有冷氣，枱與枱之間鬆動闊落，比許多茶餐廳都舒服。
老闆娘陳太最初都厭棄這地方，只是貪租平才來。她是香港人，90 年代去新加坡打工，學得一手娘惹廚藝，回港後開店，隨即爆紅。回想十多年前，她在尖沙咀赫德道起家，開店兩年已搬到北京道 4,000 呎巨舖，因為土地問題，因為最低工資，因為無良業主加租，輾轉搬到北角和小西灣，由大店變小店再變成小檔。「曾經想過放棄，又唔甘心。」陳太說。
陳太不是廚師出身，卻有烹飪天份，在新加坡工作期間，學懂做星馬菜。多次搬舖，仍不減雄心壯志。客人稱讚，又充滿力量。
為迎合地區，主攻輕巧粉麵飯小食，既有星洲海南雞、黑豉油乾撈麵，又有馬來咖喱、喇沙和胡椒湯麵，配不同豬牛雞餸料，六七十歡選擇，冠絕熟食中心！雖是熟食檔，陳太亦不敢怠慢，馬來西亞的彈牙牛丸、清香的桔仔、沙撈越的辛香胡椒，全部由當地直送，做出地道風味。
烹調也用心，招牌大細腳，早上 6 點開始炆，腍滑又入味；黑豉油撈麵跟足蔡瀾指點落重豬油，仲揀柴灣燒味老字號「新桂香」的燒豬油，純度高又有炭香，撈麵食落零舍甘香。最有 heart 是，不同湯粉麵，不會一湯走天涯，喇沙用紅衫梳囉大眼雞熬魚湯，胡椒湯用牛骨加黑白胡椒煲，雞湯米加當歸杞子滾，碗碗吃出個性。連奶茶都逐杯拉，濃香滑溜；味道比許多有名的星馬餐廳都有水準。溫馨提示，想幫襯趁早，因為舖頭每天只開到下午 4 點，而且星期日休息，要食就 mark 住時間喇！
星加坡海南雞飯 $49 海南雞超嫩滑！浸雞的湯底以全雞、金華火腿和豬骨熬足 4 小時而成，鮮味十足。油飯以珍珠米溝糯米，混合香料雞湯雞油煮，甘香爽落。
馳名怡保炆大細腳黑豉油乾撈麵 $39 招牌撈麵，用黑豉油和新桂香燒臘油撈，乾身爽滑；大細腳是豬腳和雞腳，腍滑入味，一入口即離骨。
星馬拉茶 $15 奶茶逐杯拉，質感如絲幼滑，茶味與甜味很平衡。
鮮魷魚喇沙 $42 娘惹 style 喇沙，用紅衫或梳囉熬魚湯，再加炒蝦頭蝦殼、自家炒喇沙膽和椰汁煮，味道比一般溫醇，吃出魚鮮味。
拿督星馬大飯店
地址：觀塘觀塘碼頭市政熟食中心 1 樓 20、21、28 號舖
電話：2344 2347
營業時間：星期一至五 8am-4pm，星期六 11:30am-4pm，星期日、公眾假期及每月首個星期六休息，現在至 10 月 1 日星期六休息
文：yo
歡迎你 like 我哋 U Food Facebook Page / U Food Instagram ，取得我哋更新更快嘅資訊！
