1. 葵廣最新人氣店 豆花先生
先唔講食物，呢間豆花先生開咗舖唔夠一個月，旋即成為人龍店！小記平日下晝 6 點去到，已經要排隊！老闆黃先生是台灣人，屋企人於台北開豆花店，一身好手藝！店內的芋圓及地瓜圓都是純手工製作，做 1kg 嘅芋圓花 45 至 60 分鐘，當中無添加任何化學成分，每次又不可以煮得太多，以免影響口感，心機十足。
小店的甜品分豆花及紅豆湯兩類，各配芋圓、地瓜圓、粉圓、紅豆、綠豆、仙草、檸檬愛玉等配料。不過夏天唔會供應熱豆花及紅豆湯。
招牌豆花 $28
樣樣配料都想試，咁就揀招牌豆花！有芋圓、地瓜圓、粉圓及紅豆，豆花用加拿大一級非基因改造的黃豆製，好滑又有豆香。配甜度比台灣低的黑糖糖水，清甜不膩。
每份芋圓及地瓜圓都有 7 至 8 粒。芋圓呈四方形，老闆將芋頭及番薯蒸熟壓蓉後，加木薯粉搓成。可惜兩者都食唔出芋頭及番薯味，芋圓的質地比較腍身，地瓜圓則相對煙韌。不過小店每日手工製作，誠意搭夠。
豆花先生
地址：葵涌廣場 2 樓潮流廊 2012 號
電話：6707 6169
營業時間：5pm–10pm，逢星期一休息
2. 巨型芋圓 黑丸嫩仙草
唔係無料到！「黑丸嫩仙草」呢個品牌於台灣有超過 30 間分店，更於新加坡、馬來西亞、印尼及澳洲等地開設超過 100 間店！店內的所有食材都由台灣總店空運到港，做法也跟足台灣店標準。
小店的芋圓、芋 Q、地瓜圓等都是每日於店內由人手搓成。店內有芋圓及芋 Q 兩種選擇，兩者之間嘅分別在於芋頭及麵粉的比例。大大粒嘅芋 Q 比例則是 7:3，芋頭佔 7 成，芋香十足但咬落較腍，唔算太 Q！細細粒嘅芋圓，芋頭和麵粉分量各佔一半，口感 Q 彈，芋頭迷必試！
黑丸嫩仙草 $30
滑嘟嘟嘅仙草上鋪滿芋 Q、金薯、紅豆、珍珠、鮮奶，材料豐富又唔太甜。
芋 Q 煮到好似煲爛咗嘅芋頭咁，質感粉粉哋，唔算好煙韌，但真係食到芋頭味。
九份芋圓冰 $28
黑糖冰底加入芋 Q、地瓜圓、金薯、花豆、珍珠及仙草，黑糖味好香，一口冰加一口芋圓，極速降溫。
賣相粗獷的地瓜圓，番薯味好濃！
黑丸嫩仙草
地址：太子荔枝角道 57 號地下 B2 舖
電話：9689 6313
營業時間：2pm-12mn（逢星期一休息）
3. 估佢唔到！ 康瑞涼茶
學星爺話「佢表面係個鬚刨，但實質係個風筒」。做人同揀嘢食一樣，都係唔可以單睇表面！深水埗嘅康瑞涼茶，表面上係一間平凡嘅涼茶舖，點知涼茶背後竟然有台灣芋圓食，估佢唔到！
康瑞涼茶下晝 3 點開門，不過客人要立食。到晚上 7 點，旁邊的中醫館會開放畀客人坐低食糖水。行過涼茶舖見到老闆娘搓芋圓，手工製作好吸引！點碗特色仙草百配，有齊仙草、芋圓、地瓜圓、小丸子、珍珠、紅豆、薏米、西米等，芋圓每日手工製作，煙韌富口感，更食到芋頭粒，加啲奶一齊吃，好豐富！
特色仙草百配 $25
乜料都有齊晒！有芋圓及地瓜圓、滑溜的仙草、煙韌的珍珠、有咬口的薏米，用 $25 就食到足料大大碗台式湯水，抵食！
主角芋圓由於是手工製作，每粒大細不一，質地尚算有 QQ 嘅口感，但芋頭味不明顯。
秘製軟滑糖不甩 $18
芋圓之外，幾乎每枱都會追加糖不甩。表面鋪上碎花生、椰絲及糖，碎花生略嫌太粗粒，味道一般沒特別。
康瑞涼茶
地址：深水埗醫局街 179A 地舖
電話：9034 3832
營業時間：4pm-12mn
文、攝：Jessie
歡迎你 like 我哋 U Food Facebook Page / U Food Instagram ，取得我哋更新更快嘅資訊！
