小儀:囍帖肉骨拉茶

發佈: 2016.07.19
文:

寫稿寫到咁出腸,大家都知我今期勇闖咗歡‧囍‧里,Sorry Sorry,係利東街先啱。

成條利東街,食肆特別多,好多人以為會好貴,但我實體咁踩咗落去,唔可以話勁平,但灣仔區嚟講,算係中價喎,好似我今次食呢間,中式的青磚牆配中式現代藝術,但搭咗啲酒吧燈光,型仔到震但唔算好貴,一於試。

揭下餐牌,幾得意喎,有肉骨茶、海南雞飯、喇沙、沙嗲串燒、巴東牛肉、炒貴刁‧‧‧‧‧‧如果你以為呢度係吃東南亞嘢嘅話,少年,你太年輕了,因為你只係啱咗 50%,唔食過你係唔會理解嘅,因為全部星馬及西式混血,好有新意。呢度又係酒吧又係餐廳,菜式變晒 tapas,有巴東牛仔肉芝士 Pizza、印尼辣味芒果雞、班蘭咖喱豬肉丸配黃薑飯、蟹多士等,話就話係 tapas 囉,但都唔細份,送酒又得,當晚飯食又得,飲嘢食飯一個「露畸唇」搞掂晒。

星馬茶裏面,我最冧爆「白沽嗲」,即係肉骨茶呀,(嘻嘻,我啲馬拉話幾勁)。呢度個「白沽嗲」用個銅煲上,睇到都覺得華麗呀,係吉隆坡 style,最正係臨吃先至好似馬拉拉茶咁倒入超熱嘅湯,湯倒落啲豬肉度咋,藥材香噴噴咁飄過嚟,飲落有藥材香而唔苦,原來係廚師好細心咁最後先落當歸,免得佢煲得耐苦咁話喎,肉骨其實係豬手,英國豬嚟,唔羶又啖啖肉,入到藥材味又有豐富膠質,啱晒啦!40℃ 都嚟緊啦,食佢嚟消暑解滯就啱啦。

我都話呢度好有新意,好似馬拉人好興食嘅炸雲吞咁,就變咗 taco 咁款,但個靈魂又喺返度喎,上面嘅蝦用喇沙炒過,幾得意,唔好食漏中間嘅番薯麵條呀,真係日日用機器攪再炸,脆過 18 歲。

呢度仲有好多混血菜,考考大家,冬蔭功 + 龍蝦湯 = 乜呢?原來等於海鮮燴飯,先熬咗西式龍蝦湯底再加埋香茅南薑等冬蔭功湯底煮意大利飯,諗到呢個配搭好夾喎。最開心,係我搵返喺星加坡拍《街坊廚神》時搵到嘅好嘢──柑桔仔,飲咗用佢做嘅 mocktail 唔止 refreshing,仲熱氣拜拜,店小二,同我嚟多啲煎炸嘢。


烤焗肉骨茶豬手 $158


喇沙蝦牛油果沙律炸雲吞 $98


牛油果蟹肉沙律 $98


松露芝士批 $68


Mango downfall $58

囍碟

地址:灣仔皇后大道東 200 號利東街 G31 及 F31A 號舖
電話:3974 5868
營業時間:星期日至二 12nn - 11pm,星期三至共 12nn - 1am

歡迎你 like 我哋 U Food Facebook Page / U Food Instagram ,取得我哋更新更快嘅資訊!

↓【限時搶⚡】Kilo Calo慢煮即食雞胸套裝!↓

↓ 雞胸經低溫慢煮烹調!/ 提供研製多時的獨特口味!↓


↓【必收藏】最新深圳食買玩攻略!↓

↓ 大灣區一小時生活圈!最新打卡熱點/熱門美食等!↓

more