旺中變新葵廣?帶你掃齊最新小食店

發佈: 2016.07.25
文:

商場先將 2 樓變成立食區,引入多款時下最受歡迎小食,有乜嘢?即刻睇!

1. 足一板!超甜海膽手卷


日式手卷店咁受後生仔女歡迎,旺中呢個新食場梗係唔少得啦!手卷駅開咗唔夠兩星期,已經儲咗唔少回頭客。除咗係夠抵食之外,手卷製作超認真,總之係庶渣價錢燒鵝味道!


小店有手卷手握壽司火炙壽司卷物小食 5 大類,總共近 60 款選擇。嚟到旺中開舖,定價太高隨時嚇走人,呢度嘅壽司由 $5-$12 不等,最平嘅手卷好似中華沙律及松葉蟹棒都是 $13,一份 4 件的卷物 $18 就有交易,小食最貴都只是 $15,好抵食。


全板海膽手卷 $45、火炙三文魚手卷 $16
無處不在嘅海膽手卷呀!你睇啲海膽多到就快滿瀉,因為小店用咗全板海膽,都係賣$45,真正跳樓價!現時選用大連馬糞海膽,呈橙黃色嘅海膽每片都好似手指頭咁大,完整而厚肉,味道好鮮甜兼 creamy!海膽每隔 2-3 日就返貨,新鮮沒苦味,帶甘香,水準不俗。小店計劃於 8 月轉用味道更鮮甜嘅韓國紫膽,令人好期待!



餡料緊要,用嚟包飯嘅紫菜亦不馬虎。紫菜唔係上等靚貨,但會放於燈箱內用微溫烘着,紫菜唔會受潮變腍,咬落更脆口,呢啲細節都照顧到,好細心!用嚟蘸壽司嘅豉油都有調味,平時食到嘅豉油味道太鹹,小店會加入帶甜嘅味醂調味,食落唔會鹹到刺喉。



(上) 芝士鰻魚反卷 $22/4 件、(下) 火炙三文魚壽司 $8/ 件
反卷包住忌廉芝士兩大片鰻魚,餡料多到喞出嚟。鰻魚唔腥,加埋 creamy 嘅芝士及甜甜哋嘅鰻魚醬汁,味道豐富。壽司係人手握,三文魚上的辣辣醬用辣粉、沙律醬、穀物醋及泡菜醬等調製,酸甜微辣,引出魚生的甜味。



厚燒玉子 $12
雖然玉子是現成貨,但蛋味突出不乾身。喞上大量沙律醬及秘製辣辣醬,再用火槍輕炙,食落帶點焦香。

手卷駅

地址:旺角中心第一座 2FSA30A 舖
電話:5281 3548
營業時間:12nn-10pm

2. 衝出長洲 鮮果炒雪糕
長洲唔係淨係得大大粒魚旦及糯米糍,其實仲有炒雪糕!老闆於台灣做過炒雪糕,上年於長洲開炒雪糕店,生意唔錯,於是決定衝出市區開分店。


小店嘅雪糕係稠身嘅土耳其式雪糕,除咗長洲一直賣開嘅呍呢嗱味之外,仲有新加嘅抹茶及豆腐花味。老闆話特別將雪糕的甜度減低,唔會因為雪糕嘅死甜蓋過配料嘅味道。落柯打好簡單,先揀雪糕口味,再揀配料或水果、醬料及 topping。最後再選擇用普通紙杯裝或窩夫杯裝(另加 $3)就 ok!



雪糕配料主要以生果為主,士多啤梨、芒果、香蕉、奇異果等都是用新鮮生果,無添加,食得放心。醬料就有士多啤梨、芒果、焦糖、蜂蜜、朱古力及柚子蜜。



特濃榴槤 $50
招牌榴槤炒雪糕用咗原粒泰國金枕頭榴槤肉製作,老闆建議配呍呢嗱味雪糕最夾。榴槤味香濃、呍呢嗱味奶味好香,最讚是食到粒粒榴槤果肉!


綠茶配焦糖爆谷、朱古力彩針及焦糖醬 $31
綠茶雪糕配北海道紅豆蓉一定好食,但呢個配搭太沈悶,老闆建議加焦糖味爆谷。爆谷用咗美國品牌 Garrett Popcorn 出品,香甜脆卜卜,同綠色味好夾。

CC 炒雪糕

地址:旺角中心第一座 SA27A
電話:6438 8815
營業時間:12:30nn-10pm

3. 花園街雞蛋仔入主

花園街嘅 Modos 自從轉賣口味創新嘅雞蛋仔之後,生意好到不得了!粉絲為咗底雞蛋仔,就算要係街頭等半個鐘都唔介意!呢間人氣小店最近於旺中開咗分店,今日第一日正式做生意,以後唔使係街邊滴晒汗等食,舒服得多。


分店嘅雞蛋仔口味暫時跟花園街店一樣,原味、班蘭、朱古力、積及橙朱古力、羅宋湯、特選芝士、流心蜂蜜、土鳳梨、紅豆及甜薑味,總共 10 款!負責人 Doris 透露,遲啲仲會有 2 至 3 款新口味推出,其中一款是好刺激嘅辣味,又會有不同口味的夾餅、炸物及串燒



(左) 班蘭特飲 $14 (中)、(右) 紅西柚烏龍茶 $18 (大)
新店仲有一系列以伯爵茶、烏龍茶及綠茶做 base 嘅飲品,有招牌嘅班蘭味,亦有藍莓、紅西柚、冰糖雪梨、桂圓紅棗、黑森林朱古力等,飲品可以揀少冰、走冰、少甜及走甜,仲可以加 $3 加寒天水晶蜂蜜分子。遲啲仲有用新鮮白桃、藍莓、芒果及柑桔檸檬打成的沙冰



流心蜂蜜雞蛋仔 $23
內藏蜂蜜爆珠,一咬即爆出蜂蜜,清甜不膩。


特選芝士雞蛋仔 $25
加咗 200 克嘅 mozzarella cheese 及車打芝士,芝香十足!

Modos

地址:旺角中心第一座Shop SA27A
查詢:www.facebook.com/ModosHK
營業時間:12no-11pm

4. 台中好「茶」

「清玉好茶」最近亦喺旺中插旗,原材料全由台灣入口,供應多款人氣 items,如:鐵觀音珍珠奶茶翡翠檸檬茶等等,必飲推介有鐵觀音珍珠奶茶,由台灣進口嘅茶葉,喺店內即煮即製。經烘焙過嘅鐵觀音茶味較一般濃郁,而且甜度掌握得宜!至於另一人氣飲品翡翠檸檬茶則用台灣綠茶,飲落清新之餘更帶有少許甘味!而家小店正做緊開業優惠,以正價買 1 杯飲品即可獲一張 VIP 咭,下次幫襯即可減 $3!


(右) 鐵觀音珍珠奶茶 優惠價 $19 (原價 $25)
店內人氣 no.1 ,茶葉由台灣入口,直接喺店中煮好,再加冰調味而成!味道比一般珍珠奶茶更為濃郁,茶味更重,而且珍珠偏小,食落很 Q 彈!

(左) 翡翠檸檬茶 優惠價 $25 (原價 $30)
翡翠為來自台灣嘅上乘綠茶,味道甘甜,加上鮮榨檸檬,令翡翠檸檬茶多一分青澀,夏天飲最為解渴!

清玉好茶

地址:旺角彌敦道 688 號旺角中心一期 2 樓 SA 29A
電話:2352 0826
營業時間:(試業期間)12nn-11pm

5. 葵廣起家 巨型大「戟」

呢間由葵廣起家嘅又一戟,而家都喺旺中開分店啦,主打十多款鹹甜班戟!小編採訪時正值 lunch time,見到有不少喺附近工作嘅女生都幫襯,買鹹味 pancake 當 lunch,既抵又好味!太多款唔知揀邊隻好?老闆推介店內嘅王牌──榴槤香蕉芝士班戟 ($35) 以及 Oreo 雪糕班戟 ($27),兩款都係店中大人氣!


榴槤香蕉芝士班戟 $35
齋聞到榴槤嘅飄香已經令人夠興奮,很香濃!試過先知,原來榴槤、香蕉配芝士,食落三種味道、口感都幾夾,軟綿綿,入口即融,榴槤狂迷絕對不可錯過!


Oreo 雪糕班戟 $27
材料有班戟外,仲有 oreo 餅乾及餅碎、忌廉,以及 2 球可自選款式嘅雪糕!如果你係 oreo 迷,不妨選配 cookies & cream 口味嘅雪糕,曲奇味道更為突出!

又一戟

地址:旺角彌敦道 688 號旺角中心一期 2 樓
電話:從缺
營業時間:1pm-11pm

6. $8 激抵鮮榨西瓜汁

除咗有台式飲品店進駐,代表本地嘅金沙糖亦提供女生大愛嘅鮮榨果汁,而家更有 $8 嘅西瓜椰果優惠!小編見到製作過程中並無加水,無添加夠天然!即席試飲,味道帶幾分天然甜味,而不致於死甜,讚!$8 嘅價錢,有堅‧鮮榨果汁,仲有幾粒有啲咬口嘅椰果,收貨啦!



金沙糖
地址:旺角彌敦道 688 號旺角中心一期 2 樓
電話:從缺

7. 殺落一樓!30 款日式手卷

旺中唔止 2 樓變成食街,就連 1 樓都開始有食店進駐。開咗 2 個月嘅「築卷」主打日式手卷,睇吓個餐牌有至少 30 款選擇,花多眼亂!


海膽拼三文魚手卷 $45
負責人話海膽手卷是人氣 no.1,用咗韓國馬糞海膽,橙黃嘅海膽大片厚身,每日返貨夠新鮮。


帶子拼三文魚籽手卷 $36、鰻魚手卷 $20
三文魚籽無乜腥味,帶子刺身又甜又厚肉。鰻魚手卷唔只手卷面一片鰻魚,中間都夾咗一片鰻魚,唔會淨係食飯咁陰公豬!

築卷

地址:旺角中心第 1 樓 F123A 號舖
電話:6346 6477
營業時間:12nn-10pm

文、攝:Jessie and Joyce

歡迎你 like 我哋 U Food Facebook Page / U Food Instagram ,取得我哋更新更快嘅資訊!

↓【免費送🎁】Patisserie Tony Wong全新花形系列蛋糕!↓

↓立即拎走3款口味:芒果椰子+朱古力紅桑莓+柚子芝麻!↓


↓【出Post賺現金賞】《社群》助您發展創作者事業↓

↓透過發佈帖文賺取收入!立即參加!↓

more