夜晚落九龍城想食甜品，經過金滿堂總見到人潮如鯽，雖然城南道有 3 間分店，還是愈夜愈多人。老闆李太分享，晚上來吃甜品的客人，有的不只想吃甜品，更是想訴心事，「好似最初諗到『單戀傻小子』，食落啲客人又問，不如整杯失戀、初戀等，配合返心情。」單戀是怎樣的？又酸又甜，若即若離，所以加入了新鮮士多啤梨、乳酪雪糕、士多啤梨蒟蒻，食落酸咪咪，但難以忘懷。士多啤梨蒟蒻用新鮮果肉製造，「方形蒟蒻食落有頂喉感，我哋將蒟蒻整成心形，食落滑喉。」果然十分細心。
除了新式甜品，李太的創意替她贏得客人胃口，那些年未有人整椰皇燉蛋白，她就嘗試創新加入湯丸及清心丸一齊燉，芝麻湯丸一口濃香，再咬煙韌清心丸及滲滿椰香的蛋白，好滿足！「我怕悶呀，唔想太單調，設計每道食物都要花心思去諗。」難怪好多客人變朋友，喜歡找李太傾偈，吃甜品其次，傾心事才是正經事。
椰皇蛋白燉湯丸 $42
椰香加蛋白燉出啖啖濃滑椰香精華，配埋芝麻湯丸同清心丸煙煙韌韌，女士食一個好可能已等於正餐，大滿足。
新、舊甜品都食到的金滿堂，原來有一道食物是李太「睇唔過眼」才推出，就是前幾年驚為天人的「心太軟」。「食過一間的綠茶心太軟，好難食，我忍唔住自己出手。」故此店內誕生了綠茶心太軟，配以綠茶雪糕及紅豆小丸子，配搭穩陣，香濃綠茶流心食落甘而不澀。
綠茶三重奏 $48
綠茶心太軟 + 綠茶雪糕 + 紅豆小丸子，綠茶流心食落茶味甘濃而不苦澀，綠茶雪糕亦與心太軟看齊，一碟有齊綠茶雙重享受。
甜品受歡迎唔只靠新，李太指做甜品如做人，唔會每日完美，特別係入新鮮生果，質量控制不到，例如芒果時甜時酸，控制到 20 至 30% 水準上落已好叻。係囉，邊會日日完美，盡力去做，落過心機，自然有人欣賞，好似金滿堂咁。
金玉滿堂 $36
甜品名襯返舖頭生招牌，有芒果、雪糕、小丸子、龍眼 / 蘆薈及水晶珠，典型黃色產物係芒果控最愛。
火焰山 $42
火焰山其實是士多啤梨棉花冰，聽個名都覺得霸氣，用鮮士多啤梨、蒟蒻、小丸子配搭，棉花冰食落有濃郁天然生果味道。
金滿堂甜品
地址：九龍城城南道 5、6、9 號舖
電話：2383 3102
營業時間：3pm-2am
文：Celia、攝：Suki
(原文摘自 U Magazine ISSUE 557)
歡迎你 like 我哋 U Food Facebook Page / U Food Instagram ，取得我哋更新更快嘅資訊！
