夜探大埔捐窿捐罅 食搞鬼芝士串燒

發佈: 2016.07.27
文:

邪惡搞鬼芝士串燒

要數大埔最邪惡嘅宵夜,非串燒店「彩虹」莫屬。因為店中好多串燒都配上芝士,邪惡度即刻爆燈,加上串燒名又出位,食過肯定記得!

好似「初戀芝士撞棍」,其實係響鈴加芝士,燒到香噴噴,芝士半融,再淋上秘製醬汁,賣相吸引到爆,響鈴脆口,食落酸酸甜甜,從口感到味道,都真係有初戀時又驚又喜的複雜感覺!


初戀芝士撞棍 $24

同場另一怪名之「勁辣芝士黃小虎」,就係將芝士鋪在青辣椒上燒,以芝士中和辣椒的辣味,第一啖無辣度,第二啖還可以,第三啖辣到皺眉,過癮!食完熱氣的串燒,不妨飲番枝店家自製飲品下火,今晚就有薏米水(左)及竹蔗茅根水(右),兩款飲品都明顯足料,最正就係唔太甜,飲完熱氣全消。


勁辣芝士黃小虎 $28


薏米水(左)、竹蔗茅根水(右)$14/ 枝


心太軟芝士牛丸 $20超甜燒菠蘿 $14
牛丸是芝心外,面層還舖上一層芝士同燒,雖然 Double 肥,但堅好味,唯獨食時要小心爆芝(辣)親咀。


燒美國石蠔蒜蓉 $50/3 隻
鍾意食海鮮,不妨試下蒜蓉燒石蠔,石蠔燒香後灑上蟹籽作點綴,有卜卜脆口感;蠔肉燒完沒有縮水,蠔鮮味亦沒有被蒜味蓋過,好食。


燒巨大花甲王 $62(6隻)
花甲夠新鮮,而且好大隻,堅係半隻手掌般巨大!一咬爆汁,鮮味十足!


Star War 醉蜆配烏冬 $32
以砂鍋煮所以叫 Star War ,屬店內人氣之選,先將蜆及烏冬煮好,最後才落花雕酒。蜆肉鮮甜,湯底亦充滿麻油香及酒味,食完連湯都飲埋。

彩虹小食串燒專門店
地址:大埔運頭街 12-18 號地下 B1 舖
電話: 5317 7943
營業時間:星期一至六 6pm-2am,星期四 11pm-2am,星期日休息

超多花款豆腐花

大埔除咗阿婆豆腐花外,呢間舊果香林亦係大埔人的心頭好,雖然豆花沒有強勁的豆味,但勝在夠滑,$8 起有得食,加料亦只係 $10。最得人歡喜係配搭超多,有芝麻糊、花生糊、紅豆沙、花奶、薑汁等,仲要用比平常碗較大 size 的公雞碗,黃糖亦任加,性價比一流。

誠意推介熱薏米白果豆腐花,白果及薏米煲得好腍,後者更咬口十足,甜味剛好,唔使加糖都可以食晒一碗。雖然唔似其他店有位坐低食,但舖外亦擺放多張膠櫈畀大家坐喺舖外慢慢食,都算貼心。


熱薏米白果豆腐花 $10

舊果香林豆腐花
地址:大埔大明里 28 號
電話:從缺
營業時間: 10am-12:30am

朝聖熱點!名物炸雞髀

入得大埔,冇可能唔去「三多」朝聖食炸髀。雖然而家舖頭喺太和開咗分店,坐得舒服又有冷氣,但街坊依然鍾意本店,貪佢夠地踎咁話!

去三多,冒住爆瘡危機都必食炸雞髀,雞髀即叫即炸,炸到金黃色的吉列外層香脆可口又唔油膩,咬開仲不停冒煙!最難得係雞髀肉嫩滑多汁,堪稱極品!


炸雞脾 $28

唔夠喉,可以食埋肉碎豉油王腸粉,腸粉皮厚度適中,唔會一口粉,炒得均勻,每條都沾上肉碎及芽菜,表面更有少少焦,味道啱啱好唔會過鹹。


肉碎豉油王炒腸粉 $30


夜晚 11:30 ,三多本店外仍然有近 20 人冒熱等位,可見佢幾受歡迎。

三多
地址:大埔北盛街 29 號瑞安樓地下
電話:2651-6113
營業時間:6:15pm-3:30am

足料碗仔翅大王

碗仔翅係兒時回憶,但而家愈嚟愈少舖頭或檔口賣,呢間「真和味」夠膽打正旗號叫自己做碗仔翅大王,試一試,果然足料,魚肉有魚味,又夠彈牙;最讚係味道較一般淡,唔會成口味精,加少少麻油和胡椒粉已夠味,而且唔會用匙羹攪兩攪就水汪汪。


魚肉碗仔翅 $16

真和味碗仔翅大王
地址:大埔安泰路 1 號大埔廣場地下
電話:從缺
營業時間:6pm-2am

文:Froggie

歡迎你 like 我哋 U Food Facebook Page / U Food Instagram ,取得我哋更新更快嘅資訊!

↓【限時搶⚡】 Midea美的25公升氣炸焗爐!↓

↓ 結合「氣炸」同「烘焙」︱0.2秒即熱︱7種烹調模式↓


↓【限時搶⚡】Louiscocoa鳳梨啤酒口味可可即沖營養代餐奶昔!↓

↓ 首創含微量酒精代餐 / 嚴選高級可可粉 / 加水即沖即飲!↓

more