真‧舊冰室地圖(港島篇)

發佈: 2016.07.27
文:

舊冰室分佈圖

紅色-百好咖啡餅店 | 綠色-華記士多 | 紫色-豪華咖啡茶廳 | 黃色-海安咖啡室 | 藍色-祥香茶餐廳 | 橙色-銀都冰室

花樣年華 feel 低調冰室 百好
香港好多冰室都做到出晒名,偏偏西灣河有一間低調而充滿味道的,叫「百好」。開業六十多年,每天依然為街坊默默服務。睇環境,木造天花、皮背木凳、紙皮石牆身、昏黃壁燈、玻璃枱面,還墊著老土餐牌,遠看水吧還掛著燈箱畫,係真‧舊裝修!帶點 Art Deco 味道!食物呢,也是老派西餅,如合桃蛋糕蝴蝶酥果占圈咖啡蛋卷到椰撻等。要吃飽肚,有意粉三文治多士營養餐,仲有麥皮火腿通粉菠蘿冰紅豆冰、奄列等,食物質素已經唔重要,舊情懷滿瀉了!









地址:西灣河筲箕灣道 160 號
電話:2560 2701
營業時間:6:30am - 6pm
碼頭看海情懷 海安咖啡室
要數中上環最出名的舊咖啡室,一定係海安。話說從前在西環三角碼頭、大笪地一帶,是苦力跟討生活的草根階層聚集地,在碼頭對開干諾道西的「海安咖啡室」就係大家歇腳地。店以前由老伯伯經營,店內保留了 50 年代咖啡室格局,卡座係店中 icon。食物在茶餐廳風味中,加入少許特色,有 煲仔公仔麵香葱撈麵香葱碎牛炒蛋厚多士雞湯通粉菠蘿包餐等。走過寧靜的西環,入去吃一口多士歎奶茶,遙望 / 回想一下舊時門前一片海,已經好寫意。








地址:上環干諾道西 17 號地下
電話:2540 6340
營業時間:星期一至四及六 7:30am-4:30pm、星期五 7:30am-3pm、星期日及公眾假期休息


老灣仔話當年 豪華咖啡茶廳
灣仔莊士敦道「豪華咖啡茶廳」應該無人唔識,講裝修佢無咩特別,但裏面有好多前輩叔叔,表面冷漠實質一開口好熱情,時有粗口閒話家常,不過咁先似老香港。屹立茂羅街已 60 年的「豪華」,由最初一架茶點手推車,到今日有兩間小店,舊店在茂羅街與莊士敦道交界路口,新店則在隔離動漫基地,打孖上做茶記。店內供應老香港茶記食物,有 鮮油咖央豬沙律碎蛋包沙嗲牛肉包,仲有 滾水蛋咖央多士蛋牛治餐蛋麵等,其中尤以 多士烘底最受歡迎,咖央及牛油融為一體,留住溫度,令人真.感情流露。




地點:灣仔莊士敦道 226 號富嘉大廈地下
電話:2574 3069
營業時間:5am-7pm

屋邨人情味 銀都冰室
華富邨重建如火如荼,趁舊式小店仍未徹走,可趕快去會一會開店逾 50 年的「銀都冰室」。第二代店主是姊妹花,不忍爸爸苦心經營冰室從此沒落,努力接管經營。冰室在屋邨成立翌年 1968 開業,牆身舖著小磚瓦、紙皮石地板、卡座吊扇,還掛著「請勿吐痰」字牌,店後又有通花石牆,是 60 年代舊屋邨格局。食物都是茶記 style,最正係 奶茶,茶膽沿用上一代秘方,以 3 種茶葉溝成,又濃又滑;仲有 自製菠蘿包豬仔包甜餐包等,另外 炸雞髀沙嗲牛肉包西多士紅豆冰等都有供應,想感受老屋邨情懷,呢度係首選。





地址:香港仔華富邨華光樓 707-708 號
電話︰2551 0388
營業時間︰5:30am-6pm
馳名蛋撻包餅 祥香
門口兩旁有紅字標明「馳名蛋撻」及「香濃咖啡」的「祥香茶餐廳」,亦是有 50 年歷史的舊式茶記。老茶記格局,卡座、水吧、樓上雅座,店外還有個玻璃餅櫃,陳列各式舊式包餅, 焗叉燒餐包雞尾包卷蛋紙包蛋糕,每天新鮮出爐,最特別是 蓮蓉雞尾包,是街坊早餐下午茶恩物。區外人來朝聖,一定食熱辣辣出爐 蛋撻,是牛油撻皮的,甘香鬆化,蛋漿剛剛好,又香又滑。另一馳名是 熱奶茶,由老師傅人手沖製,撞茶加奶手法純熟,奶茶熱度足,茶膽夠香濃,亦做到茶香奶香平衡,質感滑溜。









地址:西環堅尼地城卑路乍街 107 號
電話:2855 7911
營業時間:5am-7pm

文:Celia

歡迎你 like 我哋 U Food Facebook Page / U Food Instagram ,取得我哋更新更快嘅資訊!

↓【出Post賺現金賞】《社群》助您發展創作者事業↓

↓透過發佈帖文賺取收入!立即參加!↓


↓【限時搶⚡】Louiscocoa鳳梨啤酒口味可可即沖營養代餐奶昔!↓

↓ 首創含微量酒精代餐 / 嚴選高級可可粉 / 加水即沖即飲!↓

more