堅排一粒鐘 屯門爆紅章魚燒

發佈: 2016.07.29
文:

今時今日,有邊間舖頭可以旺到連生意都唔做?我見過!我真係見過!就係位於屯門青菱徑嘅「屯の大阪章魚燒」,開業直今依然人龍不斷。7 月初,店方真係喺 facebook page 叫人唔好去排隊!雖然係咁,不過佢哋並唔係囂張到有生意唔做,只係唔想大家大熱天時咁辛苦喺街外排(最少)一個鐘先有得食啫。


當日去到,有 13 個人排緊,結果就由下晝 6 點半排到 7 點半先有得食。



等待期間,見到兩個店員係舖內密密燒冇停手。

章魚燒有 4 種口味,原味大阪風、超正明太子、超爆多蟹子及激多葱風味。點解會咁受歡迎?無他,事關佢哋以刺身級的八爪魚腳作為材料,每粒丸子裏面都有大大粒章魚,食落嚼感十足,有別於其他一口粉的貨色。唔單止配料,連醬汁都唔吝嗇,唧得滿滿的,即燒即澆上醬汁即奉客,新鮮熱辣香噴噴,甜中帶鹹超惹味。


現場所見,(右)超正明太子(4 粒 $22) 最受歡迎,幾乎每人必點。喜歡清新則推薦(左)激多葱風味(4 粒 $18),雖然冇明太子的味道咁複雜,但勝在夠 fresh 唔覺膩。


一粒章魚燒 size 有乒乓波咁大,明太子食落外脆內煙韌,加上大大匙明太子及沙律醬,鹹甜辣共冶一爐,好味到不得了。


有圖有真相,咬開後真係有大大粒章魚!

由於店方堅持要燒到粒粒金黃,所以每 15-20 分鐘才做出 72 粒章魚燒,人多時無可避免有排等。嗱!唔想排隊都得,老闆話最好夜晚 9 點左右去,不過就有機會賣晒囉!食唔食到睇彩數喇!


屯の大阪章魚燒
地址:屯門青菱徑 9 號華利大廈地下 11 號舖
電話:從缺
營業時間:2pm-10pm (若遲開舖或休息,會在 FB 的 TMTakoyaki 專頁上通知)

文、攝:Froggie

歡迎你 like 我哋 U Food Facebook Page / U Food Instagram ,取得我哋更新更快嘅資訊!

↓【免費送🎁】Patisserie Tony Wong全新花形系列蛋糕!↓

↓立即拎走3款口味:芒果椰子+朱古力紅桑莓+柚子芝麻!↓


↓【限時搶⚡】Louiscocoa鳳梨啤酒口味可可即沖營養代餐奶昔!↓

↓ 首創含微量酒精代餐 / 嚴選高級可可粉 / 加水即沖即飲!↓

more