好搞鬼!午餐肉太陽蛋菜脯 Pizza

發佈: 2016.07.29
文:


呢間喺旺角嘅酒吧餐廳叫 Wolf,一向鍾意玩中、西 mix and match,之前推出的沙嗲牛肉雞蛋仔腐乳芝士火鍋,成功令餐廳彈起。最近佢哋又有新搞作,於主餐牌增設一系列 Pizza!當中有 3 款加入港式元素,用咗我哋最鍾意嘅午餐肉加菜脯、豆豉鯪魚配菠蘿、雞膶 mix 豬肋骨肉絲做配料,配搭新奇,但一啲都唔古怪!

餐蛋 x 菜脯
午餐肉加隻太陽蛋,無論早餐、Lunch、下午茶定晚飯宵夜,都係無敵組合!再玩大啲,今次大廚將午餐肉太陽蛋放喺 Pizza上!


惹味菜脯午餐肉太陽蛋 Pizza $98

超薄皮的 Pizza 先放上車打、Mozzarella、巴馬臣及帶有奶香味的大窿芝士,然後放上本地產的原味菜脯。大廚話菜脯沖洗後無需浸泡,保留其鹹香味,切粒後加糖用慢火炒香,更覺惹味。午餐肉切成細粒後連同菜脯一齊鋪在餅底上,再加少許車打芝士及巴馬臣粉。最後於中間打隻蛋,入爐焗 5 分鐘搞掂!餅底脆卜卜、菜脯粒爽口鹹香,午餐肉好足料,每啖都咬到至少兩粒。雖然午餐肉沒預先煎香,無咁香口,但經過烤烘,表面略呈金黃色,沾埋中間的蛋黃汁一齊食都好正!


菠蘿 x 豆豉鯪魚
豆豉鯪魚炒菜就食得多,仲有啲咩食法會食到人忍唔住「嘩」一聲呢?呢個升級夏威夷菠蘿豆豉鯪魚 Pizza 就有此威力!大廚話佢將同樣是鹹香嘅意大利鯷魚換成豆豉鯪魚,先將豆豉鯪魚隔油摵成絲,再加車打、Mozzaralla 芝士及新鮮菠蘿粒做餡。豆豉鯪魚好香口惹味,幸好唔會太鹹,加新鮮菠蘿粒增添清新感,有助去膩!Pizza 鋪滿晒豆豉鯪魚,目測應該用了半罐嘅分量,好足料!


升級夏威夷菠蘿豆豉鯪魚 Pizza $98

雞膶 x 紅腰豆
雞膶 Pizza?聽落真係有啲九唔搭八,但食落好驚喜!新鮮雞膶用胡椒、西芹水略煮去血腥羶味,切粒後用特製 BBQ 醬煮至半融。大廚仲加埋用 BBQ 醬醃足 4 日嘅豬肋骨,焗熟後拆絲連同雞膶、紅腰豆、車打芝士及巴馬臣芝士鋪於餅底上焗。Pizza 嘅味道好濃郁,有雞肝嘅甘香,雞膶質感又似鵝肝咁滑,豬肋骨肉絲軟腍,惹味到食完一塊又一塊!


秘製醬雞膶紅腰豆豬豬 Pizza $118

Pizza 大玩港、西元素,店中 cocktail 都一樣好玩嘢!呢杯用咗中式茶杯載住嘅雞尾酒,以鐵觀音、雙蒸米酒、檸檬汁及糖水調製而成, 鐵觀音茶味香醇,配清甜而溫和的雙蒸米酒,入口醇厚。


Tea Back $68

呢杯 PanLan Yeung,用咗自家浸的斑蘭葉 Vodka 加蘋果汁及雪梨糖水調製,味道好有東南亞 feel,斑蘭葉的味道突出,就好似一杯飲得落肚的椰汁斑蘭糕!最搞鬼的是調酒師將酒放於貝殼入面,賣相好靚!咁貝殼底的藍色神秘液體飲唔飲得?調酒師笑笑口話:得嘅!但唔會有酒味囉!


PanLan Yeung $68

呢杯同樣用了 Vodka 做 Base,再加檸檬汁及柚子果醬 Mix 成,味道甜甜酸酸好易入口,好適合用嚟配濃味的 pizza!頂層仲有一大堆泡泡,唔係純粹為咗裝飾㗎,調酒師以分子料理的方法打出柚子味的泡泡,睇得又食得!


Naive Sperm $68


WOFT
地址:旺角染布房街 7-8D 地下
電話:2116 1786
營業時間:5pm-3am

文:Jessie、攝:Lok

歡迎你 like 我哋 U Food Facebook Page / U Food Instagram ,取得我哋更新更快嘅資訊!

↓【限時搶⚡】 Midea美的25公升氣炸焗爐!↓

↓ 結合「氣炸」同「烘焙」︱0.2秒即熱︱7種烹調模式↓


↓【出Post賺現金賞】《社群》助您發展創作者事業↓

↓透過發佈帖文賺取收入!立即參加!↓

more